குற்றவாளி யாராக இருந்தாலும் நடவடிக்கை – சட்டப்பேரவையில் முதல்வர் விஜய்

குற்றவாளிகள் யாராக இருந்தாலும் அவர்கள் மீது கடுமையான நடவடிக்கை எடுக்கப்படும் என்று முதலமைச்சர் விஜய் சட்டப்பேரவையில் திட்டவட்டமாகத் தெரிவித்தார்.

சட்டப்பேரவையில் காவல்துறை மானியக் கோரிக்கை மீதான விவாதங்களுக்கு பதிலளித்து முதலமைச்சர் விஜய் உரையாற்றினார். அப்போது அவர், ஒரு மாநிலத்தின் உண்மையான முன்னேற்றம் என்பது சாலைகள் மற்றும் தொழிற்சாலைகளின் வளர்ச்சி மட்டுமல்ல, அங்கு வாழும் ஒவ்வொரு குடிமகனும் அச்சமின்றி வாழும் சூழலை உருவாக்குவதில்தான் அடங்கியுள்ளது என்று குறிப்பிட்டார். சட்டம் ஒழுங்கு சீராக இருந்தால் மட்டுமே தொழில் வளர்ச்சி மற்றும் புதிய வேலைவாய்ப்புகள் உருவாகும் என்றும் அவர் கூறினார்.

காவல்துறை என்பது குற்றவாளிகளை கைது செய்யும் அமைப்பு மட்டுமல்ல, ஒரு மாநிலத்தின் பொருளாதார வளர்ச்சி, சமூக அமைதி மற்றும் மக்களின் நம்பிக்கைக்கு அடித்தளமாக விளங்கும் ஒரு முக்கிய அமைப்பு என்றும் முதலமைச்சர் விஜய் வலியுறுத்தினார். சட்டத்தை மதித்து நடப்பவர்களுக்கு காவல்துறை ஒரு உற்ற நண்பனாக இருக்க வேண்டும் என்றும், அதே சமயம் சட்டத்தையும் பிறரின் உரிமைகளையும் மீறுபவர்களுக்கு அச்சத்தை ஏற்படுத்தும் எதிரியாகவும் திகழ வேண்டும் என்று அவர் தெரிவித்தார். ஒரு காவலர் இந்த இரண்டு பண்புகளையும் கொண்டவராக இருக்க வேண்டும் என்பதே அரசின் எதிர்பார்ப்பு.

சட்டம் ஒழுங்கை நிலைநாட்ட காவல்துறையினர் எந்தவித அச்சமும் இன்றி நேர்மையாகவும், தங்களது பணிகளை சிறப்பாகவும் செய்ய வேண்டும். அதற்கான சூழல்களை உருவாக்குவதற்கு இந்த அரசு மிகுந்த முன்னுரிமை அளித்து வருகிறது என்றும் முதலமைச்சர் விஜய் குறிப்பிட்டார்.

மேலும், முதலமைச்சராக இருந்தாலும், அமைச்சராக இருந்தாலும், அதிகாரியாக இருந்தாலும் காவல் துறையின் சட்டப்பூர்வமான நடவடிக்கைகளில் தேவையற்ற தலையீடுகள் இருக்கக் கூடாது என்பதை தொடர்ந்து வலியுறுத்தி வருவதாகவும் அவர் கூறினார். குற்றவாளி யாராக இருந்தாலும் அவர்களுக்கு எதிராக நடவடிக்கை எடுக்க வேண்டும் என்பதும், சட்டத்தின் முன் அனைவரும் சமம் என்பதுமே இந்த அரசின் அடிப்படைக் கண்ணோட்டம் என்றும் முதலமைச்சர் விஜய் சட்டப்பேரவையில் திட்டவட்டமாகத் தெரிவித்தார்.

இந்த அரசு, குற்றவாளிகளை அடையாளம் கண்டு அவர்கள் மீது பாரபட்சமின்றி நடவடிக்கை எடுப்பதில் உறுதியாக உள்ளது. மக்களின் பாதுகாப்பை உறுதி செய்வதோடு, மாநிலத்தின் ஒட்டுமொத்த வளர்ச்சிக்கும் காவல்துறை ஆற்றும் பங்களிப்பு மகத்தானது என்பதை முதலமைச்சர் தனது உரையில் சுட்டிக்காட்டினார். நேர்மையான மற்றும் அச்சமற்ற காவல்துறை அமைப்பை உருவாக்குவதே அரசின் முக்கிய குறிக்கோள் என்றும் அவர் தெரிவித்தார்.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.