கைதி திரைப்படம் மூலம் தமிழ் சினிமா ரசிகர்களின் மனதில் நீங்கா இடம் பிடித்தவர் நடிகர் அர்ஜுன் தாஸ். லோகேஷ் கனகராஜ் இயக்கத்தில் வெளியான இப்படத்தில் வில்லனாக மிரட்டிய அர்ஜுன் தாஸ், தமிழக அரசின் சிறந்த வில்லன் நடிகர் விருது உட்பட பல விருதுகளை வென்றார். தொடர்ந்து மாஸ்டர், விக்ரம் போன்ற படங்களில் நடித்து தனக்கென ஒரு தனி ரசிகர் பட்டாளத்தை உருவாக்கினார். அநீதி, ரசவாதி, போர் போன்ற படங்களிலும் நடித்துள்ள இவர், தற்போது கான் சிட்டி மற்றும் ஒன்ஸ்மோர் ஆகிய படங்களில் நடித்து வருகிறார். இதில் கான் சிட்டி திரைப்படம் வருகிற ஜூன் 26-ந்தேதி திரையரங்குகளில் வெளியாக உள்ளது.
இந்நிலையில், நடிகர் அர்ஜுன் தாஸ் ரகசியமாக நிச்சயதார்த்தம் செய்து கொள்ள உள்ளதாகவும், ஒரு நடிகையை காதலித்து வருவதாகவும் சமூக வலைத்தளங்களில் தகவல்கள் பரவின. நெருங்கிய குடும்பத்தினர் மற்றும் நண்பர்கள் முன்னிலையில் திருமணம் நடைபெற உள்ளதாகவும் செய்திகள் வெளியாகின. இந்த தகவல்கள் ரசிகர்களிடையே பெரும் எதிர்பார்ப்பை ஏற்படுத்தின.
ஆனால், இந்த திருமண வதந்திகளுக்கு தற்போது முற்றுப்புள்ளி வைக்கப்பட்டுள்ளது. இதுகுறித்து நடிகர் அர்ஜுன் தாஸின் மக்கள் தொடர்பு மேலாளர் யுவராஜ் ஒரு முக்கிய அறிவிப்பை வெளியிட்டுள்ளார். அதில், 'நடிகர் அர்ஜுன் தாஸ் திருமணம் குறித்து சமூக வலைத்தளங்களில் பரவி வரும் தகவல்களில் எந்தவிதமான உண்மையும் இல்லை' என்று திட்டவட்டமாக தெரிவித்துள்ளார்.
மேலும், இதுபோன்ற செய்திகளை வெளியிடுவதற்கு முன் அதன் உண்மைத்தன்மையை சரிபார்த்து வெளியிட வேண்டும் என்றும், ஊடக நண்பர்களை கேட்டுக்கொள்வதாகவும் யுவராஜ் தனது அறிக்கையில் குறிப்பிட்டுள்ளார். இதன் மூலம், அர்ஜுன் தாஸின் திருமணம் குறித்த வதந்திகளுக்கு அதிகாரப்பூர்வமாக முற்றுப்புள்ளி வைக்கப்பட்டுள்ளது.
