ஐக்கிய அரபு அமீரகத்தின் அபுதாபியில் உள்ள பரக்கா அணுமின் நிலையத்தின் மீது ட்ரோன் மூலம் தாக்குதல் நடத்தப்பட்டுள்ளது. இந்தத் தாக்குதல், நிலையத்தின் வெளிப்புறத்தில் இருந்த மின்சார ஜெனரேட்டரைப் பாதித்ததால், தீ விபத்து ஏற்பட்டதாக அபுதாபி ஊடக அலுவலகம் உறுதிப்படுத்தியுள்ளது. அதிர்ஷ்டவசமாக, இந்தச் சம்பவத்தில் யாருக்கும் காயம் ஏற்படவில்லை என்றும், கதிர்வீச்சு அபாயங்கள் எதுவும் இல்லை என்றும் அதிகாரிகள் தரப்பில் தெரிவிக்கப்பட்டுள்ளது. அணுமின் நிலையத்தின் முக்கிய அமைப்புகள் அனைத்தும் சீராக இயங்கி வருவதாக கூட்டாட்சி ஆணையம் தெரிவித்துள்ளது.
இந்த சந்தேகத்திற்கிடமான ட்ரோன் தாக்குதலுக்கு யார் காரணம் என்பது குறித்து இதுவரை எந்தத் தகவலும் வெளியிடப்படவில்லை. இருப்பினும், இஸ்ரேல்-அமெரிக்கா மற்றும் ஈரான் இடையேயான பதற்றமான சூழலில் இந்தத் தாக்குதல் நடந்துள்ளது கவனிக்கத்தக்கது. இதற்கு முன்னர், ஐக்கிய அரபு அமீரகம் மீது ஈரான் பல ஏவுகணை மற்றும் ட்ரோன் தாக்குதல்களை நடத்தியுள்ளது.
சர்வதேச அணுசக்தி முகமை (IAEA), ஐக்கிய அரபு அமீரக அதிகாரிகளிடமிருந்து தாக்குதல் குறித்த தகவல்களைப் பெற்றுள்ளது. கதிரியக்க அபாயங்கள் இல்லை என்பதை அதிகாரிகள் உறுதிப்படுத்தியுள்ளனர். நிலைமையை உன்னிப்பாகக் கண்காணித்து வருவதாகவும், தேவைப்பட்டால் உதவத் தயாராக இருப்பதாகவும் IAEA தெரிவித்துள்ளது.
அமெரிக்காவிற்கும் ஈரானுக்கும் இடையிலான பேச்சுவார்த்தைகள் தடைபட்டுள்ள நிலையில், விரைவில் ஒரு சமாதான ஒப்பந்தம் எட்டப்படாவிட்டால் ஈரான் கடுமையான விளைவுகளைச் சந்திக்கும் என அமெரிக்க அதிபர் டொனால்டு ட்ரம்ப் எச்சரித்துள்ளார். இந்தச் சூழலில், பரக்கா அணுமின் நிலையத்தில் நடந்த ட்ரோன் தாக்குதல் பெரும் பரபரப்பை ஏற்படுத்தியுள்ளது.
