புதுச்சேரி மாநிலம் காலாப்பட்டு பகுதியைச் சேர்ந்த ஒரே குடும்பத்தைச் சேர்ந்த மூவர், இன்று காலை விழுப்புரம் மாவட்டம் கோட்டகுப்பம் அருகே நெடுஞ்சாலையில் பைக்கில் சென்று கொண்டிருந்தனர். அப்போது, முதலியார்சாவடி கிழக்கு கடற்கரை சாலையில் அதிவேகமாக வந்த அரசு பேருந்து, அவர்கள் சென்றுகொண்டிருந்த பைக் மீது மோதியதில் 3 பேரும் தூக்கி வீசப்பட்டனர்.
இந்த கோர விபத்தில், சாலையில் தூக்கி வீசப்பட்ட மூவரும் சம்பவ இடத்திலேயே பரிதாபமாக உயிரிழந்தனர். இந்த துயரச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
தகவலறிந்து சம்பவ இடத்துக்கு விரைந்து வந்த காவல்துறையினர், உயிரிழந்த மூன்று பேரின் உடல்களையும் கைப்பற்றி, பிரேத பரிசோதனைக்காக அருகிலுள்ள அரசு மருத்துவமனைக்கு அனுப்பி வைத்தனர். மேலும், இந்த விபத்து தொடர்பாக வழக்குப்பதிவு செய்து, விசாரணை மேற்கொண்டு வருகின்றனர்.
வேகமாகச் சென்ற அரசு பேருந்து மோதியதில் ஒரே குடும்பத்தைச் சேர்ந்த 3 பேர் உயிரிழந்த சம்பவம், அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது. இச்சம்பவம் குறித்து காவல்துறையினர் தீவிர விசாரணை நடத்தி வருகின்றனர்.
