பொதுவாக கீரை வகைகள் நம் உடலுக்கும், குடலுக்கும் நன்மை செய்யக்கூடியவை. அதிலும் பருப்பு கீரையில் பல்வேறு ஆரோக்கிய நன்மைகள் அடங்கியுள்ளன. இந்த கீரை மூலம் கல்லீரல் நோய்கள் குணமடையும் என நம்பப்படுகிறது.
பருப்புக்கீரையின் வேர்வை கொப்பளங்கள், வெந்நீர் கொப்பளங்கள், தீக்காய கொப்ளங்களுக்கும் அரைத்து தடவினால் நிவாரணம் கிடைக்கும். மேலும், உடலில் உள்ள கொழுப்பைக் கரைக்கும் தன்மையும் இதற்கு உண்டு. இக்கீரையின் விதைகளை 4 கிராம் அளவிற்கு எடுத்து, தண்ணீரில் சுத்தம் செய்து இளநீரில் கலந்து பருகினால் சீதபேதி நிற்கும். வயிற்று எரிச்சல் மற்றும் சிறுநீர் எரிச்சல் போன்ற பிரச்சனைகளுக்கும் இது தீர்வாக அமையும்.
ஆரோக்கியம் தரும் பருப்புக்கீரையில் அபரிமிதமான அளவில் வைட்டமின் ஏ, சி மற்றும் பி காம்ப்ளக்ஸ் வைட்டமின்கள் நிறைந்துள்ளன. இது நுரையீரல் பாதிப்புகளில் இருந்து காக்கக்கூடிய ஆற்றல் கொண்டது. மேலும், ரத்தத்தைச் சுத்தப்படுத்தி, நீண்ட கால நோய்களின் தாக்கத்தைக் குறைக்கவும் இது உதவுகிறது.
அடிக்கடி பருப்புக்கீரையை உணவில் சேர்த்துக் கொள்பவர்களுக்கு உடல் சூடு தணியும். மலச்சிக்கல் நீங்கி ஆரோக்கியம் மேம்படும். வெயில் காலங்களில் உண்பதற்கு மிகவும் ஏற்ற கீரையாக இது கருதப்படுகிறது.
பருப்புக் கீரை மசியலுடன் நீராகாரம் சேர்த்து சாப்பிட்டு வர, வெயில் காலத்தில் ஏற்படும் உடல் சூடு, நீர்க்கடுப்பு, வியர்க்குரு, வேனல்கட்டிகள் போன்றவை தவிர்க்கப்படும். பித்தம் அதிகம் உள்ளவர்கள் மற்றும் அடிக்கடி தலைசுற்றல் உள்ளவர்களுக்கு ஆரோக்கியம் தரும் பருப்புக்கீரை மிகவும் ஏற்றது.
ஆரோக்கியம் தரும் பருப்புக்கீரை மூலம் கல்லீரல் நோய்கள் குணமடையும். இதில் ஒமேகா 3 சத்தும் நிறைந்துள்ளது. கால்சியம் சத்து குறைவாக உள்ளவர்கள் பருப்புக் கீரையைப் பயன்படுத்தினால், எளிதில் கால்சியம் கிடைக்கும்.
மேலும், பருப்புக் கீரை மலச்சிக்கலைப் போக்குவதுடன், குடற்புழுக்களை அகற்றவும் உதவுகிறது. இரைப்பையில் மிகுதியாக சுரக்கும் அமிலம் காரணமாக ஏற்படும் நெஞ்செரிச்சலையும் இது போக்கும். தலைவலி உள்ளவர்கள் பருப்புக் கீரையை மைபோல் அரைத்து தலைக்கு பற்றுப்போட்டால் தலைவலி நீங்கும்.
இவ்வாறு பல்வேறு மருத்துவ குணங்கள் நிறைந்த பருப்புக்கீரையை உணவில் சேர்த்து ஆரோக்கியமாக வாழ்வோம்.
