இந்திய ரூபாயின் மதிப்பு அமெரிக்க டாலருக்கு நிகராக வரலாறு காணாத வீழ்ச்சியை சந்தித்துள்ளது. தற்போது ஒரு அமெரிக்க டாலருக்கு நிகரான இந்திய ரூபாயின் மதிப்பு 96-ஐ கடந்துள்ளது. இது இந்திய பொருளாதாரத்திற்கு பெரும் பின்னடைவை ஏற்படுத்தியுள்ளது.
ஈரான் போர் மற்றும் ஹார்முஸ் ஜலசந்தியில் ஏற்பட்டுள்ள பதற்றமான சூழல் காரணமாக கச்சா எண்ணெயின் விலை சர்வதேச சந்தையில் தொடர்ந்து உயர்ந்து வருகிறது. ஒரு பேரல் கச்சா எண்ணெயின் விலை தற்போது 107 அமெரிக்க டாலர்கள் என்ற அளவில் உள்ளது. இந்த தொடர் விலை உயர்வு, இந்தியாவின் கச்சா எண்ணெய் இறக்குமதி செலவை கணிசமாக அதிகரித்துள்ளது. மேலும், இது நாட்டின் ஒட்டுமொத்த வெளிநாட்டு வர்த்தகத்திலும் பெரும் அழுத்தத்தை ஏற்படுத்தியுள்ளது.
இந்தியா தனது தினசரி கச்சா எண்ணெய் தேவையில் 85 சதவீதத்திற்கும் அதிகமானவற்றை இறக்குமதி செய்வதையே சார்ந்துள்ளது. எனவே, உலகளாவிய சந்தையில் கச்சா எண்ணெயின் விலை உயர்வு ஏற்படுவது, இந்திய ரூபாயின் மதிப்பில் உடனடி மற்றும் கடுமையான தாக்கத்தை ஏற்படுத்துகிறது. சர்வதேச சந்தையில் கச்சா எண்ணெய் பரிவர்த்தனைகள் அமெரிக்க டாலரிலேயே நடைபெறுவதால், ரூபாயின் மதிப்பு வலுவிழக்கும்போது இறக்குமதிச் செலவு மேலும் அதிகரிக்கிறது. இது நாட்டின் பணவீக்கத்திற்கும், எரிபொருள் விலையேற்றத்திற்கும், ஒட்டுமொத்த பொருளாதாரத்திற்கும் பெரும் சுமையை ஏற்படுத்துகிறது.
இந்த காரணங்களால், இந்திய ரூபாயின் மதிப்பு தொடர்ந்து சரிந்து வருகிறது. இன்று காலை நிலவரப்படி, அமெரிக்க டாலருக்கு நிகரான ரூபாயின் மதிப்பு 0.3 சதவீதம் சரிந்து 96.05 ஆக குறைந்தது. இந்த வீழ்ச்சி இதுவரை இல்லாத அளவாகும். இருப்பினும், இரவு நிலவரப்படி சற்று மீண்டு 95.96 ஆக இருந்தது.
