தயிர் மற்றும் மீனை ஒன்றாகச் சாப்பிடுவதால் ஏற்படும் பாதிப்புகள் குறித்து ஆயுர்வேத மருத்துவம் எச்சரித்துள்ளது. முன்னோர்களின் உணவுக்கட்டுப்பாடுகள் ஆரோக்கியத்திற்கு அடிப்படையாக இருந்தன. 'அளவுக்கு மிஞ்சினால் அமிர்தமும் நஞ்சு' என்ற பழமொழிக்கேற்ப, சில உணவுகளை குறிப்பிட்ட சில உணவுகளுடன் சேர்த்து உண்ணக்கூடாது.
பசிக்காக மட்டுமே உண்ண வேண்டும் என்றும், சுவைக்காக மட்டும் உண்பது தவறு என்றும் கூறப்படுகிறது. அந்த வகையில், மீனுடன் பால், தயிர், மோர் போன்ற பால் உணவுகளை சேர்த்து சாப்பிடுவதைத் தவிர்க்க வேண்டும். இவ்வாறு சாப்பிடுவது அஜீரணக் கோளாறுகளையும், தோல் பிரச்சனைகளையும் உண்டாக்கலாம்.
மீன் மற்றும் தயிர் இரண்டுமே புரதச்சத்து நிறைந்தவை. இவற்றை ஒன்றாக உட்கொள்ளும்போது செரிமானத்தில் பாதிப்பு ஏற்பட வாய்ப்புள்ளது. ஆயுர்வேதத்தின்படி, தயிர் மற்றும் மீன் ஒரு தவறான உணவு சேர்க்கையாகக் கருதப்படுகிறது. இதனால் செரிமான சிக்கல்கள், வாயு மற்றும் அமிலத்தன்மை போன்ற பிரச்சனைகள் ஏற்படலாம்.
முறையற்ற செரிமானம் காரணமாக, தோல் மீது தடிப்புகள் மற்றும் தோல் ஒவ்வாமை போன்ற பிரச்சனைகள் வரக்கூடும். மேலும், கண்களில் பிரச்சனைகள் மற்றும் கருவுறுதலில் எதிர்மறையான விளைவுகளையும் இது ஏற்படுத்தலாம் என ஆயுர்வேத மருத்துவம் சுட்டிக்காட்டுகிறது.
