ஆங்கிலத்தில் Emperor Fish என அழைக்கப்படும் விளமீன், இந்தியப் பெருங்கடல் மற்றும் வங்காள விரிகுடா பகுதிகளில் அதிகம் காணப்படும் ஒரு கடல் மீன் வகையாகும். இது கடலில் உள்ள பாசிகளை மட்டுமே உண்டு வளரும் ஒரு அற்புத மீன்.
மீன்களில் புரதச்சத்து, ஒமேகா 3 கொழுப்பு அமிலங்கள், வைட்டமின் டி போன்ற அத்தியாவசிய ஊட்டச்சத்துக்கள் நிறைந்துள்ளன. விளமீனில் இந்த சத்துக்கள் மிக அதிகமாக உள்ளன. இது தசை வளர்ச்சிக்கு உதவுவதுடன், கொலாஜன் உற்பத்தியை அதிகரித்து சரும ஆரோக்கியத்தையும் மேம்படுத்துகிறது. மேலும், மூளை மற்றும் இதய ஆரோக்கியத்திற்கும் ஒமேகா 3 கொழுப்பு அமிலங்கள் மிகவும் நன்மை பயக்கும்.
விளமீனின் தனிச்சிறப்பு என்னவென்றால், இதை எப்படி சமைத்தாலும் அதற்கு ஏற்றவாறு சுவை மாறும். க்ரில் செய்தால் ஜூஸியாகவும், ஃப்ரை செய்தால் மொறுமொறுப்பாகவும் இருக்கும். குழம்பு வைத்தால் மசாலாவை நன்கு உள்வாங்கி சுவையாக மாறும். இதன் மென்மையான சதைப்பற்று மற்றும் நடுவில் உள்ள ஒரு முள் காரணமாக, குழந்தைகளும் முதியவர்களும் கூட இதை எளிதாக சாப்பிடலாம்.
விளமீனை சுத்தம் செய்யும்போது அதன் குடலை நன்றாகச் சுத்தம் செய்ய வேண்டும். சில சமயங்களில் அதன் வயிற்றுப் பகுதியில் உள்ள பை கட் ஆகிவிட்டால் ஒருவித மருந்து வாசனை வரலாம். இது கடலில் உள்ள பாசிகளை உண்பதால் ஏற்படும் இயல்பான வாசனைதான், அதனால் பயப்படத் தேவையில்லை.
