சிபிஎஸ்இ பள்ளிகளில் 6-ம் வகுப்பு முதல் மூன்று மொழிகள் கட்டாயம் என அறிவிக்கப்பட்டிருப்பது தமிழகத்தில் பெரும் அதிர்ச்சியையும் கவலையையும் ஏற்படுத்தியுள்ளது. குறிப்பாக, 9-ம் வகுப்பு மாணவர்களுக்கு குறுகிய காலத்தில் புதிய மொழியைக் கட்டாயப்படுத்துவது மாணவர்களின் கல்விச் சுமையையும் மன அழுத்தத்தையும் அதிகரிக்கும் என பாமக நிறுவனர் ராமதாஸ் தெரிவித்துள்ளார்.
தமிழகத்தில் பல ஆண்டுகளாக இருமொழிக் கொள்கை நடைமுறையில் உள்ளது. தமிழ் மற்றும் ஆங்கிலம் மூலம் மாணவர்கள் கல்வி, வேலைவாய்ப்பு, உயர்கல்வி என அனைத்து துறைகளிலும் சிறந்து விளங்குகின்றனர். இந்நிலையில், தமிழகத்தின் தனித்துவமான மொழிக் கொள்கையை புறக்கணித்து மூன்றாவது மொழியைத் திணிக்க முயற்சிப்பது மாநில உரிமைகளில் தலையிடுவதாகும் என அவர் குறிப்பிட்டுள்ளார்.
ஏப்ரல் மாத அறிவிப்பில் 9-ம் வகுப்பிற்கு மூன்றாவது மொழி மூன்று ஆண்டுகளில் கட்டாயமாக்கப்படும் எனக் கூறப்பட்ட நிலையில், மே 15-ம் தேதி அதைத் திருத்தி இந்த கல்வியாண்டிலிருந்தே அமல்படுத்தப்படும் என அறிவித்தது மாணவர்களிடையே குழப்பத்தையும் எதிர்ப்பையும் உருவாக்கியுள்ளது. இந்தியாவில் உள்ள 22 மொழிகளில் ஏதேனும் இரண்டு மொழிகளை கட்டாயப்படுத்துவது நடைமுறைக்கு சாத்தியமற்றதுடன், மாணவர்களின் கல்வி சுதந்திரத்தையும் பாதிக்கும் என அவர் சுட்டிக்காட்டியுள்ளார்.
மொழி என்பது கற்றலின் கருவி மட்டுமல்ல, அது ஒரு இனத்தின் அடையாளமும் பண்பாட்டின் வெளிப்பாடும் ஆகும். ஒரே மாதிரியான கல்விக் கொள்கையை நாடு முழுவதும் திணிப்பது கூட்டாட்சி தத்துவத்திற்கு எதிரானது. தமிழக மாணவர்களுக்கு தேவையற்ற கல்விச் சுமையை ஏற்படுத்தும் மூன்று மொழிக் கொள்கையை திணிக்கும் எந்த முயற்சியையும் பாட்டாளி மக்கள் கட்சி கடுமையாக எதிர்க்கும் என்றும், சிபிஎஸ்இ அறிவிப்பை மத்திய கல்வி அமைச்சகம் உடனடியாக திரும்பப் பெற வேண்டும் என்றும் ராமதாஸ் வலியுறுத்தியுள்ளார்.
