சென்னை மெரினா கடற்கரையில் கடந்த 22-ஆம் தேதி கடல் அலையில் சிக்கி மாயமான பிளஸ்-1 மாணவர் சுதர்சனின் உடல் நேற்று துறைமுகம் கடற்கரை பகுதியில் கரை ஒதுங்கியுள்ளது. இதுகுறித்து போலீசார் விசாரணை மேற்கொண்டு வருகின்றனர்.
ஆவடி பகுதியைச் சேர்ந்த கணேசன் என்பவரின் மூத்த மகன் சுதர்சன் (16). இவர் மெரினா கண்ணகி சிலை அருகே கடலில் விளையாடிக் கொண்டிருந்தபோது ராட்சத அலையில் சிக்கி மாயமானார். இதுகுறித்து மெரினா காவல் நிலைய போலீசாரும், கடலோர காவல் படையினரும் இணைந்து மாணவனை தீவிரமாக தேடும் பணியில் ஈடுபட்டனர்.
பலத்த தேடுதலுக்குப் பிறகு, மாணவர் சுதர்சனின் உடல் நேற்று துறைமுகம் கடற்கரை பகுதியில் கண்டெடுக்கப்பட்டது. போலீசார் மாணவனின் உடலை மீட்டு பிரேத பரிசோதனைக்காக ராயப்பேட்டை அரசு மருத்துவமனைக்கு அனுப்பி வைத்தனர்.
இந்த துயரச் சம்பவம் குறித்து மெரினா போலீசார் வழக்குப்பதிவு செய்து மேலும் விசாரணை நடத்தி வருகின்றனர். கடலில் விளையாடும்போது கவனமாக இருக்க வேண்டும் என போலீசார் பொதுமக்களுக்கு அறிவுறுத்தியுள்ளனர்.
