ஐபிஎல் 2026 தொடரில் பிளே ஆஃப் சுற்றுக்கு முன்னேறியுள்ள ராஜஸ்தான் ராயல்ஸ் அணிக்கு ஒருபுறம் கொண்டாட்டம் ஒருபுறம் சோகம் சூழ்ந்துள்ளது. அணியின் கேப்டன் ரியான் பராக், தான் உடற்தகுதியுடன் இல்லை என்றும், தான் விளையாடியிருக்கக் கூடாது என்றும் வெளிப்படையாகக் கூறியுள்ளது ரசிகர்களிடையே அதிர்ச்சியை ஏற்படுத்தியுள்ளது.
மும்பை இந்தியன்ஸ் அணிக்கு எதிரான போட்டியில் ராஜஸ்தான் ராயல்ஸ் அணி 30 ரன்கள் வித்தியாசத்தில் வெற்றி பெற்றது. இந்தப் போட்டியில் விளையாடியது தனது மன உறுதி காரணமாகவே என்றும், உண்மையில் தான் விளையாடியிருக்கக் கூடாது என்றும் கேப்டன் ரியான் பராக் போட்டிக்குப் பிறகு தெரிவித்துள்ளார். 'நான் நிச்சயமாக உடற்தகுதியுடன் இல்லை. இது அனைத்தும் மன உறுதிதான். நான் இன்று விளையாடியிருக்கக் கூடாது. நான் வேறு எந்த ஆட்டத்திலும் விளையாடியிருக்கக் கூடாது' என அவர் திட்டவட்டமாகத் தெரிவித்துள்ளார்.
முன்னதாக, ஐபிஎல் 2026 இல் ரியான் பராக் ஏற்கனவே இரண்டு ஆட்டங்களில் விளையாடவில்லை. தொடையில் ஏற்பட்ட தசைநார் காயம் காரணமாக ராயல் சேலஞ்சர்ஸ் பெங்களூரு (RCB) மற்றும் லக்னோ சூப்பர் ஜெயன்ட்ஸ் (LSG) அணிகளுக்கு எதிரான போட்டிகளில் அவர் பங்கேற்கவில்லை. அவர் இல்லாத நிலையில், யஷஸ்வி ஜெய்ஸ்வால் ராஜஸ்தான் ராயல்ஸ் அணிக்கு தலைமை தாங்கினார். தசைநார் காயங்கள் குணமடைய சில நாட்கள் முதல் பல மாதங்கள் வரை ஆகலாம். காயத்தின் தன்மையை ராஜஸ்தான் ராயல்ஸ் அணி இதுவரை உறுதிப்படுத்தவில்லை.
இந்தப் போட்டிக்குப் பிறகு பேசிய பராக், 'நான் பல துணிச்சலான முடிவுகளை எடுத்துள்ளேன். இந்த சீசனில் நான் எடுத்த பல துணிச்சலான முடிவுகள் எனது தலைமைத்துவ பாணிக்கு ஏற்பவே அமைந்தன. விமர்சனங்களுக்கு அப்பால், எனது அணுகுமுறையே வெற்றிகளுக்கு காரணம். இப்படித்தான் நான் தலைமை தாங்க விரும்புகிறேன். வாய்ப்புகளைப் பயன்படுத்திக் கொள்ள வேண்டும்; இது ஒரு சூதாட்டம் அல்ல. எண்களை விட உள்ளுணர்வுக்குத்தான் எப்போதும் முக்கியத்துவம் தர வேண்டும்' என்று தனது தலைமைத்துவ பாணியை விளக்கினார். மேலும், தனது இந்த அணுகுமுறை வெற்றிக்கு வழிவகுத்ததாகக் கூறிய அவர், பிரிஜேஷ் ஷர்மா மற்றும் யஷ் ராஜ் புஞ்சா ஆகியோருக்குப் பாராட்டுகளைத் தெரிவித்தார்.
அணி பிளேஆஃப்களுக்கு தகுதி பெற்றது குறித்து பேசிய அவர், 'நாங்கள் மிக முன்னதாகவே தகுதி பெற்றிருக்க வேண்டும். சற்று தாமதமாக்கிவிட்டோம். நிறைய விஷயங்களை கவனிக்காமல் விட்டுவிட்டோம். கடந்த மூன்று ஆட்டங்களாக நாங்கள் குறைபாடுகளை சரிசெய்து வருகிறோம். எங்கள் தவறுகளிலிருந்து கற்றுக்கொண்டு சிறந்த ஆட்டத்தை வெளிப்படுத்துவோம் என்று நம்புகிறேன்' என்று நம்பிக்கையுடன் கூறினார்.
