இந்தியாவின் தலைசிறந்த மேலாண்மை கல்வி நிறுவனங்களான 'இந்தியன் இன்ஸ்டிடியூட் ஆஃப் மேனேஜ்மென்ட்' (IIM)களில் சேர்வதற்கான பொது நுழைவுத் தேர்வு 'காமன் அட்மிஷன் டெஸ்ட்' (CAT) ஆகும். கல்கத்தா, அகமதாபாத், பெங்களூர் உள்ளிட்ட 20க்கும் மேற்பட்ட இடங்களில் IIM கல்வி நிறுவனங்கள் செயல்பட்டு வருகின்றன. உலகத்தரம் வாய்ந்த மேலாண்மை கல்வியை இந்திய மாணவர்களுக்கு வழங்க வேண்டும் என்ற நோக்கத்துடன் இந்திய அரசால் இவை நிறுவப்பட்டு, நிதியுதவியுடன் சிறப்பாக நடத்தப்படுகின்றன.
ஒவ்வொரு ஆண்டும் நடத்தப்படும் CAT தேர்வுக்கான அறிவிப்பு, சேர்க்கை நடைபெறுவதற்கு ஒரு வருடத்திற்கு முன்பே வெளியிடப்படுகிறது. உதாரணமாக, 2027 ஆம் ஆண்டு சேர்க்கைக்கான அறிவிப்பு 2026 ஜூலையிலும், தேர்வு 2026 நவம்பரிலும் நடைபெறும். IIM கல்வி நிறுவனங்கள் மட்டுமின்றி, சில முன்னணி வேளாண்மை கல்வி நிறுவனங்களும் CAT தேர்வின் மதிப்பெண்களை ஏற்றுக்கொண்டு மாணவர் சேர்க்கையை நடத்துகின்றன.
IIM கல்வி நிறுவனங்களில் இளங்கலை, முதுகலை, நிர்வாகிகளுக்கான சிறப்புப் படிப்புகள், முனைவர் பட்டப் படிப்புகள், சான்றிதழ் மற்றும் ஆன்லைன் படிப்புகள் என பல்வேறு நிலைகளில் படிப்புகள் வழங்கப்படுகின்றன. IPM (5 ஆண்டுகள் BA + MBA), BMS, B.Sc (Economics/Data Science) போன்ற இளங்கலைப் படிப்புகளும், MBA/PGP, PGPABM, PGPPUBLIC POLICY போன்ற முதுகலைப் படிப்புகளும் இதில் அடங்கும். மேலும், Executive MBA, Executive Programme in Business Finance, Blended MBA போன்ற பணிபுரிபவர்களுக்கான சிறப்புப் படிப்புகளும், FPM, EFPM போன்ற முனைவர் பட்டப் படிப்புகளும் வழங்கப்படுகின்றன.
CAT தேர்வை எழுத, பல்கலைக்கழகத்தால் அங்கீகரிக்கப்பட்ட இளநிலைப் பட்டம் பெற்றிருக்க வேண்டும். பட்டப்படிப்பில் குறைந்தபட்சம் 50% மதிப்பெண்கள் பெற்றிருக்க வேண்டும். தாழ்த்தப்பட்ட, பழங்குடியினர் மற்றும் மாற்றுத்திறனாளிகளுக்கு 45% மதிப்பெண்கள் போதுமானது. பட்டப்படிப்பின் இறுதி ஆண்டு பயிலும் மாணவர்களும் விண்ணப்பிக்கலாம். வயது வரம்பு இல்லை. கணக்கியல் துறையில் பட்டம் பெற்றவர்களும் இத்தேர்வை எழுதலாம்.
CAT தேர்வு கணினி வழியில் (Computer Based Test) 120 நிமிடங்கள் நடைபெறும். இது மூன்று முக்கியப் பிரிவுகளாகப் பிரிக்கப்பட்டுள்ளது: மொழித்திறன் மற்றும் வாசித்துப் புரிந்துகொள்ளும் திறன் (40 நிமிடங்கள், 24 கேள்விகள்), தரவு விளக்கம் மற்றும் தர்க்க ரீதியான பகுத்தறிவுத் திறன் (40 நிமிடங்கள், 20 கேள்விகள்), மற்றும் அளவுசார் திறனாய்வுத் திறன் (40 நிமிடங்கள், 20 கேள்விகள்). மொத்தம் 68 கேள்விகள் கேட்கப்படும்.
