சட்டப்பேரவைத் தேர்தலில் தமிழக காங்கிரஸின் படுதோல்வி குறித்து விரிவாக ஆய்வு செய்ய 5 பேர் கொண்ட உண்மை கண்டறியும் குழு அமைக்கப்பட்டுள்ளது. திமுக தலைமையிலான கூட்டணியில் காங்கிரஸ் கட்சி 28 தொகுதிகளில் போட்டியிட்டு, வெறும் 5 தொகுதிகளில் மட்டுமே வெற்றி பெற்றது.
இந்த தோல்விக்கு கட்சி நிர்வாகிகள் மற்றும் தொண்டர்கள் பல தொகுதிகளில் முறையாக தேர்தல் பணியாற்றாததும், சொந்தக் கட்சி வேட்பாளர்களை வீழ்த்தும் நோக்கில் சிலர் கட்சி விரோத செயல்களில் ஈடுபட்டதும் முக்கிய காரணம் என டெல்லி தலைமைக்கு அடுத்தடுத்து புகார்கள் சென்றன. இதைத் தொடர்ந்து, தேர்தல் தோல்வி மற்றும் புகார்கள் குறித்து ஆய்வு செய்து உரிய நடவடிக்கை எடுக்க, தமிழக காங்கிரஸ் மேலிடப் பொறுப்பாளர் கிரஷ் சோடங்கர் இந்தக் குழுவை அமைத்துள்ளார்.
இதுகுறித்து அவர் வெளியிட்டுள்ள அதிகாரப்பூர்வ அறிவிப்பில், 'கட்சியின் வெற்றி வாய்ப்பை பாதிக்கும் வகையில், கட்சி விரோத நடவடிக்கைகளில் ஈடுபட்டோரை கண்டறிந்து நடவடிக்கை எடுக்க இந்த உண்மை கண்டறியும் குழு அமைக்கப்பட்டுள்ளது. இந்தக் குழுவில் தலைவராக முன்னாள் எம்பி ஜெயக்குமார் செயல்படுவார். தமிழக காங்கிரஸ் துணைத் தலைவர்கள் சொர்ணா சேதுராமன், சி.டி.மெய்யப்பன், கமலிகா காமராஜர் ஆகியோர் உறுப்பினர்களாக இடம் பெற்றுள்ளனர்' எனத் தெரிவித்துள்ளார்.
இக்குழுவினர் விரைவில் பாதிக்கப்பட்ட தொகுதிகளுக்கு நேரில் சென்று வேட்பாளர்கள் மற்றும் உள்ளூர் நிர்வாகிகளிடம் விசாரணை நடத்தி, தங்கள் இறுதி அறிக்கையை டெல்லி மேலிடத்திற்கு சமர்ப்பிக்க உள்ளனர். இதன் அடிப்படையில் கட்சிப் பணியை சரியாக செய்யாதவர்கள் மீது கடுமையான ஒழுங்கு நடவடிக்கை பாயும் என எதிர்பார்க்கப்படுகிறது.
