23-ஆவது உலகக் கோப்பை கால்பந்து தொடர் கடந்த 11-ஆம் தேதி தொடங்கியது. மெக்சிகோ, கனடா, அமெரிக்கா ஆகிய 3 நாடுகளில் இந்த உலகக் கோப்பை கால்பந்து தொடர் நடைபெற்று வருகிறது. இந்த தொடரில் மொத்தம் 48 அணிகள் பங்கேற்றுள்ளன. அவை 12 பிரிவுகளாக பிரிக்கப்பட்டு, ஒவ்வொரு பிரிவிலும் தலா 4 அணிகள் இடம்பெற்றுள்ளன. லீக் சுற்றின் முடிவில், ஒவ்வொரு பிரிவிலும் முதல் 2 இடங்களைப் பிடிக்கும் அணிகள் மற்றும் சிறந்த 3-வது இடத்தைப் பிடிக்கும் 8 அணிகள் என மொத்தம் 32 அணிகள் நாக் அவுட் சுற்றுக்கு முன்னேறும்.
இந்நிலையில், குரூப் பி பிரிவில் இடம்பெற்றுள்ள கனடா மற்றும் போஸ்னியா அணிகளுக்கு இடையே இன்று ஒரு லீக் ஆட்டம் நடைபெற்றது. ஆட்டத்தின் 21-வது நிமிடத்தில் போஸ்னியா வீரர் ஜோவோ லுகி முதல் கோலை அடித்து தனது அணிக்கு முன்னிலை பெற்றுத் தந்தார். இதனால் முதல் பாதி முடிவில் போஸ்னியா 1-0 என முன்னிலை வகித்தது.
இரண்டாவது பாதியில் கனடா அணி கோல் அடிக்க தீவிரமாக முயற்சி மேற்கொண்டது. அதன் பலனாக, ஆட்டத்தின் 78-வது நிமிடத்தில் கனடா வீரர் செலி லரின் கோல் அடித்து ஆட்டத்தை சமன் செய்தார். இதன் மூலம் இரு அணிகளும் 1-1 என்ற கோல் கணக்கில் சமநிலை பெற்றன. ஆட்டத்தின் இறுதிவரை இரு அணிகளும் வெற்றி கோலை அடிக்க கடுமையாகப் போராடின.
இறுதியில், இந்த பரபரப்பான ஆட்டம் 1-1 என்ற கோல் கணக்கில் டிராவில் முடிந்தது. இதன் காரணமாக, கனடா மற்றும் போஸ்னியா அணிகளுக்கு தலா 1 புள்ளி வழங்கப்பட்டது. இந்த ஒரு புள்ளி மூலம், குரூப் பி பிரிவில் கனடா முதல் இடத்திலும், போஸ்னியா இரண்டாவது இடத்திலும் உள்ளன.
