2027 ஆம் ஆண்டு தென் ஆப்பிரிக்கா, ஜிம்பாப்வே மற்றும் நமீபியாவில் நடைபெறவிருக்கும் ஒருநாள் போட்டி உலகக்கோப்பைத் தொடருக்கான இந்திய அணியை முன்னாள் தொடக்க வீரர் வாசிம் ஜாஃபர் தேர்வு செய்துள்ளார். இந்த உலகக்கோப்பையை வெல்ல அனுபவ வீரர்களைக் கொண்ட அணிதான் சரியான தேர்வு என்ற அடிப்படையில் அவர் தனது பிளேயிங் லெவனைத் தேர்வு செய்துள்ளார்.
இந்திய அணியின் தொடக்க வீரர்களாக ரோஹித் சர்மா மற்றும் சுப்மன் கில் ஆகியோர் களமிறங்குவார்கள் என வாசிம் ஜாஃபர் தெரிவித்துள்ளார். இவர்களுக்கு அடுத்தபடியாக, மூன்றாவது இடத்தில் விராட் கோலியையும், நான்காவது இடத்தில் ஸ்ரேயாஸ் ஐயரையும் அவர் தேர்வு செய்துள்ளார். இது பேட்டிங் வரிசையில் அனுபவத்தையும், ஸ்திரத்தன்மையையும் உறுதி செய்யும் வகையில் அமைந்துள்ளது.
விக்கெட் கீப்பர் பொறுப்பை கே.எல்.ராகுலிடம் ஒப்படைத்துள்ள ஜாஃபர், அவரை ஐந்தாவது இடத்தில் களமிறக்க திட்டமிட்டுள்ளார். ஆறாவது இடத்தில் ஆல்-ரவுண்டராக ஹர்திக் பாண்டியா இடம்பெறுவார். இவர்களது அதிரடி ஆட்டம், ஆட்டத்தின் போக்கையே மாற்றும் வல்லமை கொண்டது.
சுழற்பந்து வீச்சில், அக்சர் படேல் ஒரு ஆல்-ரவுண்டராகவும், குல்தீப் யாதவ் முதன்மை சுழற்பந்து வீச்சாளராகவும் அணியில் இடம் பெற்றுள்ளனர். இவர்களது சுழற்பந்து வீச்சு, எதிரணி பேட்ஸ்மேன்களுக்கு பெரும் சவாலாக அமையும்.
வேகப்பந்து வீச்சைப் பொறுத்தவரை, ஜஸ்பிரித் பும்ராவுடன் அனுபவம் வாய்ந்த முகமது ஷமியை மீண்டும் ஜோடி சேர்த்துள்ளார். 2023 உலகக்கோப்பையில் பும்ரா-ஷமி ஜோடி ஏற்படுத்திய தாக்கத்தை மனதில் கொண்டு இந்த முடிவை எடுத்துள்ளதாகக் கூறப்படுகிறது. முகமது ஷமி கடந்த 2025 சாம்பியன்ஸ் டிராபிக்குப் பிறகு இந்திய அணிக்காக விளையாடவில்லை என்பது குறிப்பிடத்தக்கது.
மூன்றாவது வேகப்பந்து வீச்சாளராக முகமது சிராஜ் அணியில் இடம்பெற்றுள்ளார். இதன் மூலம், இந்திய பந்துவீச்சுப் படை பலமாகவும், அனுபவம் வாய்ந்ததாகவும் இருக்கும் என எதிர்பார்க்கப்படுகிறது.
முழுக்க முழுக்க இளம் வீரர்களை மட்டுமே நம்பாமல், பெரிய தொடர்களில் தங்களை நிரூபித்த அனுபவ வீரர்களுக்கே வாசிம் ஜாஃபர் முன்னுரிமை கொடுத்துள்ளார். இது 2027 உலகக்கோப்பையை வெல்லும் வாய்ப்பை அதிகரிக்கும் என அவர் நம்புகிறார்.
வாசிம் ஜாஃபர் தேர்வு செய்துள்ள இந்திய உலகக்கோப்பை அணி: ரோஹித் சர்மா, சுப்மன் கில் (கேப்டன்), விராட் கோலி, ஸ்ரேயாஸ் ஐயர், கே.எல்.ராகுல் (விக்கெட் கீப்பர்), ஹர்திக் பாண்டியா, அக்சர் படேல், குல்தீப் யாதவ், ஜஸ்பிரித் பும்ரா, முகமது ஷமி, முகமது சிராஜ்.
