நடிகர் விஷ்ணு விஷால் நடிப்பில், கடந்த ஜூலை 3ஆம் தேதி திரையரங்குகளில் வெளியான 'கட்டா குஸ்தி-2' திரைப்படம், வசூல் ரீதியில் பெரும் சாதனை படைத்துள்ளது. இயக்குநர் செல்வா அய்யாவு இயக்கத்தில், வேல்ஸ் நிறுவனம் தயாரித்த இந்தப் படத்தில் விஷ்ணு விஷாலுக்கு ஜோடியாக ஐஸ்வர்யா லட்சுமி நடித்துள்ளார். இருவரின் இயல்பான நடிப்பும் ரசிகர்களை வெகுவாகக் கவர்ந்துள்ளது.
உறவுகளின் முக்கியத்துவம், திருமண வாழ்க்கையில் நம்பிக்கை, வாழ்க்கைத் துணையின் கனவுகளுக்கு மதிப்பளித்தல் போன்ற ஆழமான கருத்துக்களை இப்படம் நகைச்சுவை இழையோடு எடுத்துரைக்கிறது. ஒவ்வொரு காட்சியிலும் நகைச்சுவை நிறைந்திருப்பதால், திரையரங்குகளில் ரசிகர்களின் கைதட்டல் தொடர்ந்து ஒலித்து வருகிறது.
'கட்டா குஸ்தி-2' திரைப்படம் வசூலில் புதிய மைல்கல்லை எட்டியுள்ளது. ஜூலை 16ஆம் தேதி நிலவரப்படி, படத்தின் மொத்த வசூல் ₹55 கோடியைத் தாண்டியுள்ளது. குறிப்பாக, ₹50 கோடி வசூல் என்ற சாதனையை முறியடித்துள்ளது.
இந்த மகத்தான வெற்றி குறித்து நடிகர் விஷ்ணு விஷால் தனது ட்விட்டர் பக்கத்தில் நெகிழ்ச்சியுடன் பகிர்ந்துள்ளார். 'என் வாழ்க்கையின் முதல் ₹50 கோடி வசூல் சாதனை… என் வாழ்நாளில் நான் என்றும் மறக்க முடியாத தருணம்!' என அவர் குறிப்பிட்டுள்ளார்.
மேலும், 'திரையரங்குகளுக்கு வருகை தந்து, டிக்கெட் எடுத்து, இத்திரைப்படத்தைக் கண்டு களித்து, சிரித்து, ஆரவாரம் செய்து 'கட்டா குஸ்தி 2' திரைப்படத்தைக் கொண்டாடிய ஒவ்வொரு அன்பு ரசிகருக்கும் என் நெஞ்சார்ந்த நன்றிகளை தெரிவித்து கொள்கிறேன். நீங்கள் என் மீது காட்டும் இந்த அளவற்ற அன்புதான் என்னுடைய மிகப்பெரிய பலம்' என்றும் அவர் உருக்கமாகத் தெரிவித்துள்ளார்.
தொடர்ந்து, 'இன்னும் கடுமையாக உழைக்கவும், மிகச் சிறந்த கதைகளைத் தேர்ந்தெடுத்து உங்களிடம் கொண்டு சேர்க்கவும், என்னுடைய முழு ஆற்றலையும் கொடுத்து உங்களை எப்போதும் மகிழ்விக்கவும் நான் தொடர்ந்து பாடுபடுவேன்' என்று தனது உறுதிமொழியையும் அவர் வழங்கியுள்ளார்.
கடந்த 2022ஆம் ஆண்டு வெளியான 'கட்டா குஸ்தி' படத்தின் முதல் பாகம் மக்களிடையே பெரும் வரவேற்பைப் பெற்றதைத் தொடர்ந்து, அதன் இரண்டாம் பாகமான 'கட்டா குஸ்தி 2' மீது ரசிகர்கள் மத்தியில் பெரும் எதிர்பார்ப்பு நிலவியது. குடும்பங்கள் கொண்டாடும் வகையில், நகைச்சுவை மற்றும் ஆக்ஷன் கலந்து உருவாக்கப்பட்ட இப்படம், வெளியான நாள் முதலே திரையரங்குகளில் வெற்றிகரமாக வசூலித்து வருகிறது.
