தமிழகத்தின் சூப்பர் ஸ்டார் நடிகர் விஜய், தனது அரசியல் பயணத்தை தமிழக வெற்றிக் கழகம் (த.வெ.க.) மூலம் தொடங்கியுள்ளார். முதல் தேர்தலிலேயே முதலமைச்சராக பதவியேற்று, எம்.ஜி.ஆரைப் போலவே சாதனை படைத்துள்ள விஜய், தற்போது தனது கட்சியை தேசிய அளவில் விரிவுபடுத்தும் மாஸ்டர் பிளானில் இறங்கியுள்ளதாக தகவல்கள் தெரிவிக்கின்றன.
எம்.ஜி.ஆர்., 1972-ல் திமுக-விலிருந்து விலகி, அதிமுக-வை தொடங்கினார். 1974-ல் தனது கட்சியை அகில இந்திய அண்ணா திராவிட முன்னேற்றக் கழகம் என பெயர் மாற்றி, தேசிய அளவில் கட்சியை வளர்த்தார். அதே பாணியில், தற்போது முதல்-அமைச்சர் விஜய், தனது த.வெ.க.-வை தேசிய கட்சியாக மாற்ற திட்டமிட்டுள்ளதாக கூறப்படுகிறது.
தற்போது, தமிழகத்தின் அண்டை மாநிலங்களான கேரளா, கர்நாடகா, ஆந்திரா மற்றும் புதுச்சேரி ஆகிய மாநிலங்களில் 'விஜய் மக்கள் இயக்கம்' வலுவாக செயல்பட்டு வருகிறது. அம்மாநிலங்களில் விஜய்க்கு கணிசமான ரசிகர் பட்டாளமும் உள்ளது. இந்த ரசிகர் பட்டாளத்தை த.வெ.க.-வின் அதிகாரப்பூர்வ மாநிலக் கிளைகளாக மாற்றி, கட்சியை தேசிய அளவில் வளர்க்க விஜய் திட்டமிட்டுள்ளதாக கூறப்படுகிறது.
தமிழகத்திற்கு வெளியே உள்ள தமிழ் மக்கள் மற்றும் விஜய் ரசிகர்களின் ஆதரவை ஒருங்கிணைப்பதன் மூலம், த.வெ.க.-வை ஒரு மாநிலக் கட்சியாக மட்டும் சுருக்கிக் கொள்ளாமல், வருங்காலத்தில் இந்திய அளவில் ஒரு முக்கிய தேசிய சக்தியாக நிலைநிறுத்த முடியும் என விஜய் நம்புவதாகவும் கூறப்படுகிறது. இதற்கான ஆரம்பகட்ட பணிகள் பிற மாநில நிர்வாகிகளுடன் விரைவில் தொடங்கப்படும் என்றும், அதைத் தொடர்ந்து அங்கு நடைபெறும் தேர்தல்களிலும் த.வெ.க. களம் இறங்கும் என்றும் எதிர்பார்க்கப்படுகிறது.
