2025 அக்டோபரில் வீரமணி மீது போக்சோ (POCSO) வழக்கு பதிவு செய்யப்பட்ட நிலையில், வெறும் 5 மாதங்களுக்குள், அதாவது 2026 பிப்ரவரிக்குள், காவல்துறையைத் தன் கட்டுப்பாட்டில் வைத்திருந்தவர் இந்த வழக்கின் விசாரணையை முடிக்க முயன்றதை அறிந்திருந்தாரா? அவரது இரும்புக்கரம் வலுவிழந்திருந்ததா? என்று திமுகவை தமிழக வெற்றிக் கழகம் (தவெக) அதன் ஐடி பிரிவு மூலம் கடுமையாகக் கேள்வி எழுப்பியுள்ளது.
இது தொடர்பாக தவெக தனது எக்ஸ் தளத்தில் வெளியிட்டுள்ள பதிவில், பொள்ளாச்சி வழக்கிற்காகப் பொங்கி எழுந்து குரல் கொடுத்த கொத்தடிமைகளும், அவர்களின் பண்ணையாரும் தற்போது ஏன் அமைதி காக்கிறார்கள்? மெழுகுவர்த்தி ஏந்தி ஊர்வலம் சென்ற அண்ணனும் தங்கையும் இப்போது ஏன் கமுக்கமாக இருக்கிறார்கள்? என்று வினவியுள்ளது. அப்போது அவர்கள் பொங்கியது தேர்தல் ஆதாயத்திற்காகவா என்றும் கேள்வி எழுப்பியுள்ளது.
மேலும், யார் இவ்வழக்கை முடிக்கச் சொல்லி அதிகாரிகளுக்கு உத்தரவிட்டது? பாட்டியைப் பிடிக்கத் தனிப்படை அமைத்த பண்ணையார், வீரமணி மீதான போக்சோ வழக்கைப் பற்றி வாய் திறக்க மறுப்பது ஏன்? என்றும் தவெக தனது பதிவில் குறிப்பிட்டுள்ளது.
உரிமைகளுக்காகப் போராடிய தூய்மைப் பணியாளர்கள், ஆசிரியர்கள், செவிலியர்கள், விவசாயிகள் போன்றோர் மீது காவல்துறையை ஏவல்துறையாக்கி அதிகார அத்துமீறலில் ஈடுபட்டவருக்கு, வீரமணி வழக்கின் விசாரணையை முடுக்கிவிட வக்கில்லையா? என்றும் தவெக கேள்வி எழுப்பியுள்ளது.
'அனைவரும் தன்னை அப்பா என்று அழைக்கிறார்கள்' என்று படப்பிடிப்பு நடத்தி, தன்னை 'அப்பா' என்று திணித்துக் கொண்ட போலி அப்பாவிற்கு, பாதிக்கப்பட்டவர்கள் குழந்தைகள் என்பது தெரியாதா? அல்லது அக்கறை இல்லையா? சட்டம் ஒழுங்கைக் காக்கும் துறையைத் தன் கையில் வைத்திருந்தவர், யாரைக் காப்பாற்ற வாயை மூடிக் கொண்டிருக்கிறார்? குற்றமுள்ள நெஞ்சு குறுகுறுக்கிறதோ? என்றும் தவெக விமர்சித்துள்ளது.
'அப்பா' என்று தன்னை முன்னிறுத்திக் கொண்டவரின் ஆட்சியில் முடிக்கப் பார்த்ததாகக் கூறப்படும் வழக்கை, தற்போது வெளிச்சத்திற்குக் கொண்டு வந்திருக்கிறார் தமிழக இளைஞர்களின் அண்ணன், வெற்றித் தலைவர்! மக்கள் எல்லாவற்றையும் பார்த்துக் கொண்டிருக்கிறார்கள். மக்களின் தீர்ப்பு, கள்ளமௌனம் காப்பவர்களைக் கதிகலங்கச் செய்யப் போவது உறுதி என்றும் தவெக தனது பதிவில் குறிப்பிட்டுள்ளது.
