2026 ஐபிஎல் தொடரில் 15 வயது சிறுவன் வைபவ் சூர்யவன்ஷி அபாரமாக விளையாடி பல சாதனைகளை படைத்த நிலையில், இது டி20 கிரிக்கெட்டின் அதீத சாதகத்தை காட்டுவதாக ஆஸ்திரேலியாவின் முன்னாள் வீரரும், இந்திய அணியின் முன்னாள் பயிற்சியாளருமான கிரெக் சாப்பல் கடும் அதிருப்தி தெரிவித்துள்ளார்.
இந்த ஐபிஎல் சீசனில் 16 இன்னிங்ஸ்களில் விளையாடிய வைபவ் சூர்யவன்ஷி, 64 பவுண்டரிகள் மற்றும் 72 சிக்சர்களை அடித்து, 237.31 ஸ்ட்ரைக் ரேட்டில் 776 ரன்கள் குவித்து அதிக ரன்கள் எடுத்ததற்கான ஆரஞ்சு தொப்பியை வென்றார். ஜஸ்பிரித் பும்ரா, பாட் கம்மின்ஸ், மிட்செல் ஸ்டார்க், ஜோஷ் ஹேசில்வுட் போன்ற உலகின் தலைசிறந்த பவுலர்களை அவர் எளிதாக எதிர்கொண்டார். இவரது ஆட்டத்திற்காக இந்திய அணியிலும் வாய்ப்பு கிடைத்தது.
கிரெக் சாப்பல், வைபவ் சூர்யவன்ஷியின் ஆட்டத்தை பாராட்டிய அதேசமயம், தற்போதைய டி20 கிரிக்கெட் விதிகளால் பவுலர்களின் நிலைமை பரிதாபமாக மாறியுள்ளதாக எச்சரித்துள்ளார். 'உடல் ரீதியாக முழுமையான வளர்ச்சி கூட அடையாத ஒரு 15 வயது சிறுவனால், சர்வதேச அரங்கில் உலகின் தலைசிறந்த பவுலர்களை மிக எளிதாக அவமானப்படுத்த முடிகிறது என்றால், அது இந்த விளையாட்டில் உள்ள பெரிய குறைபாட்டையே காட்டுகிறது' என அவர் கூறினார். மேலும், நவீன பேட்கள், சிறிய பவுண்டரி எல்லைகள், தட்டையான ஆடுகளங்கள் ஆகியவை கிரிக்கெட்டை பேட்ஸ்மேன்களின் கைகளுக்கு ஒட்டுமொத்தமாக மாற்றிவிட்டன என்றும் விமர்சித்தார்.
தற்போதைய டி20 போட்டிகள் பவுண்டரி, சிக்சர்களை அடிக்கும் இயந்திரத்தனமான விளையாட்டாக மாறிவிட்டதாக சாப்பல் வேதனை தெரிவித்தார். சவால்கள் இல்லாத விளையாட்டில் சுவாரஸ்யம் இருக்காது என்றும், கேப்டன், பவுலர், பேட்ஸ்மேன்களுக்கு இடையிலான திட்டமிடல் காணாமல் போய்விட்டதாகவும், விக்கெட்டுகளுக்கு இடையே ஓடி ரன் எடுக்கும் வழக்கமே அழிந்துவிட்டதாகவும் அவர் குறிப்பிட்டார். பந்துவீச்சாளர்களுக்கும், பேட்ஸ்மேன்களுக்கும் இடையிலான சமநிலையை மீண்டும் கொண்டு வர, ஒரு டி20 இன்னிங்ஸில் பேட்டிங் அணி அதிகபட்சம் 6 விக்கெட்டுகளை மட்டுமே இழக்க அனுமதிக்க வேண்டும், அனைத்து டி20 ஆடுகளங்களிலும் குறைந்தது 3 மிமீ அளவுக்கு புற்கள் இருக்க வேண்டும், ஆடுகளத்தின் ஒரு பகுதி வேகப்பந்து வீச்சாளர்களுக்கும், மறுபகுதி சுழற்பந்து வீச்சாளர்களுக்கும் சாதகமாக வறண்டு இருக்க வேண்டும் போன்ற விதிமுறை மாற்றங்களை சாப்பல் முன்மொழிந்துள்ளார். எல்பிடபிள்யூ விதியிலும் மாற்றம் கொண்டுவர வேண்டும், பந்து எங்கு பிட்ச் ஆனாலும் நேராக சென்று ஸ்டம்பில் பட்டால் பேட்ஸ்மேனுக்கு அவுட் வழங்க வேண்டும் என்றும், இதுபோன்ற மாற்றங்களால் இளம் திறமையாளர்களின் உண்மையான திறமை மேலும் மெருகேறும் என்றும் அவர் வித்தியாசமான ஆலோசனைகளை வழங்கியுள்ளார்.
