தமிழகத்தில் சட்டம் ஒழுங்கு நிலைமை மிகவும் மோசமடைந்துள்ளதாக எதிர்க்கட்சித் தலைவர் உதயநிதி ஸ்டாலின் கடுமையாக விமர்சித்துள்ளார். தலைநகர் சென்னையிலேயே சாலையில் ஒரு சரித்திரப் பதிவேடு குற்றவாளி விரட்டிக் கொல்லப்பட்ட சம்பவத்தைக் குறிப்பிட்டு, அவர் இந்த குற்றச்சாட்டுகளை முன்வைத்துள்ளார்.
நாளை முதலமைச்சர் காவல்துறை மானியக் கோரிக்கை மீது பதிலுரை அளிக்க உள்ள நிலையில், அவரது கட்சியைச் சேர்ந்த ஒருவரே கொலை செய்யப்பட்டிருப்பது அதிர்ச்சியை ஏற்படுத்தியுள்ளது. இதுகுறித்து உதயநிதி ஸ்டாலின் தனது எக்ஸ் (முன்னர் ட்விட்டர்) தளத்தில் பதிவிட்டுள்ளார்.
அவரது பதிவில், 'நாளை மாண்புமிகு முதலமைச்சர் காவல்துறை மானியக் கோரிக்கை விவாதம் மீது பதிலுரை அளிப்பதற்கு முன்பாக அவரது கட்சிப் பிரமுகர் ஒருவரே தலைநகரில் கொலைக்கு ஆளாகியுள்ளார். அதுவும், தனது உயிருக்குப் பாதுகாப்பு வேண்டி ஆளும் த.வெ.க.வில் இணைந்த சரித்திரப் பதிவேடு குற்றவாளி சாலையில் ஓட ஓட விரட்டிக் கொல்லப்பட்டுள்ளார். இதுதான் தமிழ்நாட்டின் ‘வெற்றி சட்டம்-ஒழுங்கு’ நிலை!' என குறிப்பிட்டுள்ளார்.
மேலும், தலைநகரிலேயே சாலையில் இப்படி ஒரு கொலை நடக்கும் அளவுக்கு சட்டம் ஒழுங்கு சீர்கெட்டுப் போயிருப்பதை நினைத்து வருந்த வேண்டுமா அல்லது சரித்திரப் பதிவேடு குற்றவாளிகள் எல்லாம் தஞ்சமடையும் குப்பைத் தொட்டியாக த.வெ.க. மாறிவிட்டதை நினைத்து வருந்த வேண்டுமா என்றும் அவர் கேள்வி எழுப்பியுள்ளார்.
இந்த சம்பவத்திற்கும் தி.மு.க.வை எப்படி குற்றம் சொல்லலாம் என யோசிப்பதை நிறுத்திவிட்டு, பொதுமக்களின் பாதுகாப்பை உறுதிசெய்வதற்கான நடவடிக்கைகளை அரசு உடனடியாக மேற்கொள்ள வேண்டும் என்றும் உதயநிதி ஸ்டாலின் வலியுறுத்தியுள்ளார். இந்த சம்பவம் தமிழகத்தின் சட்டம் ஒழுங்கு குறித்த தீவிரமான கேள்விகளை எழுப்பியுள்ளது.
