சென்னை: பாளையங்கோட்டை மத்திய சிறையில் அடைக்கப்பட்டுள்ள திமுக எம்எல்ஏ மார்க்கண்டேயனை, எதிர்க்கட்சித் தலைவர் உதயநிதி ஸ்டாலின் இன்று நேரில் சந்தித்து நலம் விசாரித்தார். இந்த சந்திப்பு குறித்து உதயநிதி ஸ்டாலின் தனது எக்ஸ் (முன்னர் ட்விட்டர்) பக்கத்தில் விரிவாகப் பதிவிட்டுள்ளார்.
அவரது பதிவில், 'சர்வாதிகாரப் போக்கைக் கடைப்பிடிக்கும் இந்த அரசு, பழிவாங்கும் நோக்குடன் கைது செய்துள்ள கழக சட்டமன்ற உறுப்பினர் அண்ணன் மார்க்கண்டேயன் அவர்களை பாளையங்கோட்டை மத்திய சிறையில் இன்று சந்தித்தோம். சிறையில் இருந்தாலும், கழகப் பணிகளையும் மக்கள் சேவையையும் முன்பை விட இன்னும் அதிக உத்வேகத்துடன் தொடர அவர் தயாராக உள்ளார். அவரது உடல்நலம் குறித்து விசாரித்தோம்' என்று குறிப்பிட்டுள்ளார்.
மேலும், 'அண்ணன் மார்க்கண்டேயன் அவர்களின் விடுதலைக்காக, கழகத் தலைவர் மு.க.ஸ்டாலின் அவர்களின் வழிகாட்டுதலின்படி, கழக வழக்கறிஞர்கள் மேற்கொண்டு வரும் சட்டப்பூர்வமான நடவடிக்கைகளை அவருக்கு எடுத்துக்கூறி ஆறுதல் தெரிவித்தோம். மிசா மற்றும் நெருக்கடி நிலையை சந்தித்த அனுபவம் திமுகவிற்கு உண்டு. தற்போதைய அரசு, தட்டுத்தடுமாறி ஆட்சிக்கு வந்து, கட்டுப்பாடின்றி செயல்பட்டு வருகிறது. இந்த அரசின் கைது நடவடிக்கைகளுக்கு திமுகவின் கடைக்கோடி தொண்டர்கள் கூட அஞ்சமாட்டார்கள்' என்றும் அவர் தெரிவித்துள்ளார்.
தொடர்ந்து, 'விமர்சனங்களை எதிர்கொள்ளும் வகையில் செய்யப்படும் ஒவ்வொரு கைது நடவடிக்கையின்போதும், நீதிமன்றத்தில் இந்த ஆட்சியாளர்கள் கண்டிக்கப்படுகிறார்கள். இதன்மூலம், மக்கள் மன்றத்திலும் இந்த ஆட்சியாளர்கள் சரிவைச் சந்திப்பது உறுதி' என உதயநிதி ஸ்டாலின் தனது பதிவில் குறிப்பிட்டுள்ளார். இந்த சந்திப்பு அரசியல் வட்டாரத்தில் முக்கியத்துவம் பெற்றுள்ளது. திமுக எம்எல்ஏ மார்க்கண்டேயன் கைது செய்யப்பட்ட விவகாரம் தொடர்பாக சட்டரீதியான நடவடிக்கைகள் தொடர்ந்து நடைபெற்று வருகின்றன.
