ஹாலிவுட்டின் புகழ்பெற்ற 'ஸ்பைடர்மேன்' திரைப்படத் தொடரில் ஸ்பைடர்மேனாக நடித்து உலகப் புகழ் பெற்ற நடிகர் டோபி மாகுவேர், தனது முன்னாள் மனைவி ஜெனிஃபர் மேயரின் மறுமணத்தை முன்னின்று நடத்தி வைத்து நெகிழ்ச்சியை ஏற்படுத்தியுள்ளார். 10 ஆண்டுகளுக்கு மேலாக பிரிந்து வாழ்ந்து வந்த இத்தம்பதியினர், கடந்த மாதம்தான் அதிகாரப்பூர்வமாக விவாகரத்து பெற்றனர்.
51 வயதான டோபி மாகுவேர், 2020-ஆம் ஆண்டில் தனது மனைவி ஜெனிஃபர் மேயரைப் பிரிந்தார். இவர்களுக்கு 19 மற்றும் 17 வயதில் இரண்டு பிள்ளைகள் உள்ளனர். கடந்த ஆறு ஆண்டுகளாக விவாகரத்து கோரி மனு தாக்கல் செய்திருந்த நிலையில், கடந்த செப்டம்பரில் இருவரும் அதிகாரப்பூர்வமாக விவாகரத்து பெற்று பிரிந்தனர்.
விவாகரத்து நடைபெற்ற சில நாட்களிலேயே, ஜெனிஃபர் மேயர், இசை நிறுவன உரிமையாளரும் பிரபல தொழிலதிபருமான ஜெஃப்ரி ஒகுன்லேசிக்கை திருமணம் செய்து கொண்டார். இந்த திருமணத்தை டோபி மாகுவேரே முன்நின்று நடத்தி வைத்ததுடன், திருமண விழாவையும் சிறப்பாக வழிநடத்தியுள்ளார். இது பலரையும் ஆச்சரியத்தில் ஆழ்த்தியுள்ளது.
இந்த திருமண விழா ஹவாயில் உள்ள போர் சீசன்ஸ் ரிசார்ட் லனாயில் நடைபெற்றது. இதில் புகழ்பெற்ற நடிகர் லியோனார்டோ டிகாப்ரியோ உள்ளிட்ட பல ஹாலிவுட் பிரபலங்கள் கலந்துகொண்டனர். இது தொடர்பான புகைப்படங்கள் இணையத்தில் வைரலாகி வருகின்றன.
டோபி மாகுவேரும் அவரது முன்னாள் மனைவி ஜெனிஃபர் மேயரும் விவாகரத்துக்குப் பின்னரும் சிறந்த நண்பர்களாகத் தொடர்ந்து வருகின்றனர். இந்த நட்புதான், தனது முன்னாள் மனைவியின் மறுமணத்தை இவ்வளவு சிறப்பாக முன்னின்று நடத்த டோபிக்கு உந்துதலாக இருந்ததாகக் கூறப்படுகிறது. இந்த நெகிழ்ச்சியான நிகழ்வு பலராலும் பாராட்டப்பட்டு வருகிறது.
ஜெனிஃபர் மேயர் மற்றும் ஜெஃப்ரி ஒகுன்லேஸ் தம்பதியினருக்கு இந்த திருமணத்திற்கு ஐந்து மாதங்களுக்கு முன்புதான் ஒரு பெண் குழந்தை பிறந்துள்ளது. இந்தச் சூழலில் நடைபெற்ற இத்திருமணம், குடும்ப உறவுகளின் முக்கியத்துவத்தையும், பரஸ்பர மரியாதையையும் எடுத்துக்காட்டுவதாக அமைந்துள்ளது.
'ஸ்பைடர்மேன்' கதாபாத்திரத்தின் மூலம் ரசிகர்களின் மனதில் நீங்கா இடம் பிடித்த டோபி மாகுவேரின் இந்த மனிதநேயச் செயல், அவரது ரசிகர்களை மட்டுமல்லாது பலரையும் கவர்ந்துள்ளது. பிரிந்த பின்னரும் ஒருவருக்கொருவர் ஆதரவாக இருப்பது மனித உறவுகளுக்கு ஒரு சிறந்த உதாரணமாக அமைந்துள்ளது.
