தமிழக அரசின் 'தாய் மாமன் தங்க மோதிரம்' திட்டத்திற்கான கொள்முதல் டெண்டரில், பிரபல நகைக்கடை நிறுவனமான ஜாய் ஆலுக்காஸ் வெறும் 1 பைசா சேவைக் கட்டணத்தில் ஒப்பந்தத்தை வென்றது பெரும் விவாதத்தை ஏற்படுத்தியுள்ளது. சுமார் ₹755 கோடி மதிப்பிலான இந்த பிரம்மாண்ட அரசு டெண்டர் முடிவுகள் வெளியானதைத் தொடர்ந்து, தமிழக அரசியல் களத்திலும் சமூக வலைதளங்களிலும் காரசாரமான விவாதங்களும் கேலிகளும் வெடித்துள்ளன.
இந்தச் சூழலைச் சாதகமாகப் பயன்படுத்திக் கொண்ட எதிர்க்கட்சியான அதிமுகவின் ஐடி விங், சமூக வலைதளங்களில் புதிய அரசியல் விவாதத்தைக் கிளப்பியுள்ளது. நடிகர் விஜய் முன்னதாக ஜாய் ஆலுக்காஸ் நகைக்கடை நிறுவனத்தின் பிராண்ட் அம்பாசிடராக (Brand Ambassador) நடித்து வெளிவந்த பழைய விளம்பர வீடியோக்கள் மற்றும் புகைப்படங்களை மீண்டும் இணையத்தில் வைரலாக்கி, அதிமுகவினரால் டிரெண்ட் செய்யப்பட்டு வருகிறது.
“நம்ம புரோ விஜய் தான் இந்த பிராண்ட் அம்பாசிடர்! அதான் 1 பைசாவுக்கே டெண்டர் முடிஞ்சிடுச்சு போல!” என அதிமுக ஐடி விங் நிர்வாகிகள் சமூக வலைதளப் பக்கங்களில் கிண்டலாகப் பதிவிட்டு மீம்களைப் பகிர்ந்து வருகின்றனர். அரசு டெண்டர் செயல்முறையின் வெளிப்படைத்தன்மை குறித்தும், வணிக நிறுவனங்கள் இதில் பங்கேற்ற விதம் குறித்தும் பல்வேறு கேள்விகளையும் விமர்சனங்களையும் அவர்கள் முன்வைத்துள்ளனர்.
அதிமுகவின் இந்த விமர்சனங்களுக்குத் தமிழக வெற்றிக் கழகத்தின் (தவெக) ஆதரவாளர்கள் இணையத்தில் உடனுக்குடன் பதிலடி கொடுத்து வருகின்றனர். தமிழ்நாடு மருத்துவ சேவைகள் கழகத்தால் (TNMSC) விதிகள் மற்றும் சட்டப்பூர்வ நடைமுறைகளின்படியே வெளிப்படையாக டெண்டர் நடத்தப்பட்டதாகவும், எவ்விதக் கூடுதல் லாபமும் இன்றி அரசுத் திட்டத்திற்கு ஆதரவளிக்கும் நோக்கில் குறைந்த விலைப்புள்ளி (L1) சமர்ப்பிக்கப்பட்டு ஒப்பந்தம் பெறப்பட்டதில் அரசியல் உள்நோக்கம் கற்பிப்பது தவறானது என்றும் அவர்கள் மறுப்பு தெரிவித்து வருகின்றனர்.
இந்நிலையில், இந்த விவகாரம் குறித்து சந்தேகம் எழுப்பும் விதமாக அதிமுக ஐடி விங் ஒரு எக்ஸ் பதிவை வெளியிட்டுள்ளது. அதில், “தாய் மாமன் தங்க மோதிரம்” திட்டத்தின் ஒப்பந்தப்புள்ளி கோரிய நிறுவனங்கள் குறித்த விவரங்கள் சமூக ஊடகங்களில் செய்தியாக வந்துள்ளன. ஜாய் அலுக்காஸ் நிறுவனம் 0.01 பைசா செய்கூலி சேதார அளவில் இந்த மோதிரத்தை செய்வதாக கூறி ஒப்பந்தத்தைப் பெற்றுள்ளதாக செய்திகள் வருகின்றன.
இந்த ஜாய் அலுக்காஸ் நிறுவனத்தின் Sister Concern எனக் கூறப்படும் ஜோஸ் அலுக்காஸ் நிறுவனத்தின் Brand Ambassador ஆக விளம்பரங்கள் நடித்தவர் நடிகர் விஜய் தான் என்றும், மற்ற நிறுவனங்கள் எல்லாம் 400-15000 ரூபாய் வரை செய்கூலி அளவு கோரிய போது, இந்த நிறுவனம் வெறும் ஒரு பைசா கோரி இருப்பது புருவங்களை உயர்த்தாமல் இல்லை என்றும் அந்த பதிவில் தெரிவிக்கப்பட்டுள்ளது.
மேலும், தமிழக அரசு Major Shareholder ஆக இருக்கும் Titan நிறுவனத்திடம் இந்த விலையை Match செய்ய அரசு கோரியதா என்றும், தனியார் நிறுவனம் செய்வதற்கு பதிலாக அரசு நிர்வகிக்கும் நிறுவனமே செய்தால் அது இன்னும் செம்மையாக அமையுமே என்றும், இது குறித்து தமிழக முதலமைச்சர் அவர்கள் நடவடிக்கை எடுக்க வேண்டும் என்றும் அதிமுக கேள்வியெழுப்பியுள்ளது.
சுமார் ₹755 கோடி மதிப்பிலான இந்த அரசு டெண்டர் முடிவுகள் அரசியல் களத்தில் பெரும் விவாதத்தை ஏற்படுத்தியுள்ளது. எதிர்க்கட்சியான அதிமுகவின் ஐடி விங், நடிகர் விஜய்யின் பழைய விளம்பரப் படங்களை வைரலாக்கி, 1 பைசா சேவைக் கட்டணத்தில் ஒப்பந்தம் பெற்ற ஜாய் ஆலுக்காஸ் நிறுவனத்தின் வெளிப்படைத்தன்மை குறித்து கேள்விகளை எழுப்பியுள்ளது. இதற்கு தவெக ஆதரவாளர்கள் டெண்டர் விதிப்படிதான் நடத்தப்பட்டது என பதிலடி கொடுத்துள்ளனர்.
