சென்னை: தமிழகத்தில் உள்ள 234 சட்டமன்ற தொகுதிகளுக்கும், 'வாய்ஸ் ஆப் வேளச்சேரி' போன்ற பிரத்யேக மொபைல் செயலிகள் உருவாக்கப்படும் என தகவல் தொழில்நுட்பவியல் துறை அமைச்சர் குமார் சட்டசபையில் அறிவித்துள்ளார்.
சட்டசபையில் செயற்கை நுண்ணறிவு மற்றும் தகவல் தொழில்நுட்பவியல் துறை மானியக் கோரிக்கை மீதான விவாதத்தில் அமைச்சர் குமார் பேசுகையில், 'தற்போது, 'வாய்ஸ் ஆப் பெரம்பூர்' மற்றும் 'வாய்ஸ் ஆப் வேளச்சேரி' ஆகிய இரண்டு தொகுதிகளுக்கு பிரத்யேக செயற்கை நுண்ணறிவு (AI) செயலி உருவாக்கப்பட்டுள்ளது. இந்த செயலிகளின் முக்கிய நோக்கம், பொதுமக்கள் தங்கள் பகுதிகளில் உள்ள குடிநீர், மின்சாரம், சாலை வசதி போன்ற எந்தவொரு பிரச்சனையாக இருந்தாலும், அதை எளிதாக அரசின் கவனத்திற்குக் கொண்டு வருவதாகும்.
இந்த செயலியைப் பயன்படுத்த பொதுமக்கள் எழுதப் படிக்கத் தெரிந்திருக்க வேண்டிய அவசியமில்லை. ஆங்கிலம் தெரிந்திருக்க வேண்டிய தேவையும் இல்லை. அவர்கள் தங்கள் பிரச்சனைகளைத் தமிழில் இயல்பாகப் பேசினால் போதுமானது. செயற்கை நுண்ணறிவு தொழில்நுட்பம், அந்த குரலைப் புரிந்துகொண்டு, அது எந்தத் துறை சம்பந்தப்பட்டது என்பதை அடையாளம் கண்டு, தேவையான விவரங்களுடன் சம்பந்தப்பட்ட சட்டமன்ற உறுப்பினரின் அலுவலகத்திற்கு அனுப்பி வைக்கும்.
இந்த முறையைப் பின்பற்றி, தமிழகத்தில் உள்ள மற்ற 234 சட்டமன்ற தொகுதிகளுக்கும் இதே போன்ற பிரத்யேக மொபைல் செயலிகள் விரைவில் உருவாக்கப்படும் என்பதை மகிழ்ச்சியுடன் தெரிவித்துக் கொள்கிறேன். இதன் மூலம், மக்களின் குறைகள் விரைவாக அரசின் கவனத்திற்குச் செல்லும்.
மேலும், பொதுமக்கள் ஒரு புகாரைப் பதிவு செய்தவுடன், அதற்கு ஒரு தனித்துவமான புகார் எண் வழங்கப்படும். இந்த எண்ணைப் பயன்படுத்தி, தங்கள் புகார் மீது எடுக்கப்பட்ட நடவடிக்கைகள் குறித்த விவரங்களை பொதுமக்கள் அறிந்து கொள்ள முடியும் என்றும் அமைச்சர் குமார் தெரிவித்தார். இந்த புதிய செயலி, மக்களின் குறைகளைத் தீர்ப்பதில் ஒரு முக்கிய பங்காற்றும் என எதிர்பார்க்கப்படுகிறது.
