செப்டம்பர் 1ஆம் தேதி முதல் தமிழகம் முழுவதும் உள்ள முக்கிய திருக்கோயில்களில் பக்தர்கள் செல்போன் கொண்டு செல்ல முழுமையாக தடை விதிக்கப்பட்டுள்ளது. இந்த அதிரடி அறிவிப்பை இந்து சமய அறநிலையத்துறை வெளியிட்டுள்ளது.
பழனி தண்டாயுதபாணி திருக்கோயிலில் நாளை முதல் பக்தர்கள் செல்போன் எடுத்துச் செல்ல அனுமதி இல்லை. பக்தர்கள் தங்கள் செல்போன்களை கிரிவல வீதியில் உள்ள லாக்கரில் வைத்துவிட்டு, டோக்கன் பெற்றுக்கொள்ளலாம். தரிசனம் முடிந்த பிறகு செல்போனை திரும்பப் பெற்றுக் கொள்ளலாம் என கோயில் நிர்வாகம் தெரிவித்துள்ளது.
திருச்சி ஸ்ரீரங்கம் ரங்கநாதர் கோயிலுக்கு வரும் பக்தர்களின் செல்போன்களைப் பாதுகாக்க, மூன்று கோபுர வாசல்களிலும் சிறப்பு கவுண்டர்கள் அமைக்கப்பட்டுள்ளன. இங்குள்ள 3 ஆயிரம் பெட்டகங்களில் அதிகபட்சமாக 15 ஆயிரம் செல்போன்கள் வரை பாதுகாப்பாக வைக்க ஏற்பாடு செய்யப்பட்டுள்ளது. ஒரு செல்போனுக்கு ரூ.5 கட்டணம் வசூலிக்கப்படும் என்றும், தெற்கு, வடக்கு, கிழக்கு வாசல்களில் தலா 500 பெட்டகங்கள் கொண்ட அறைகள் தயார் நிலையில் உள்ளதாகவும் கோயில் நிர்வாகத்தினர் தெரிவித்துள்ளனர்.
உலகப் புகழ் பெற்ற மதுரை மீனாட்சி சுந்தரேசுவரர் கோயில் வளாகத்தில் 2018 பிப்ரவரி 2-ம் தேதி ஏற்பட்ட தீ விபத்தைத் தொடர்ந்து, பாதுகாப்பு காரணங்களுக்காக பக்தர்கள் செல்போன் கொண்டு செல்லக் கூடாது என மதுரை அமர்வு உத்தரவிட்டது. கோயில்கள் போன்ற முக்கியமான இடங்களில் செல்போன்கள் தவறாகப் பயன்படுத்தப்படுவதற்கான பாதுகாப்பு அச்சுறுத்தல்கள் இருப்பதாகவும் நீதிமன்றம் குறிப்பிட்டது. இதன் தொடர்ச்சியாக, 2018 மார்ச் 3 முதல் மீனாட்சி அம்மன் கோயிலில் செல்போன் தடை நீடித்து வருகிறது. நாளை முதல் திருப்பரங்குன்றம், அழகர் கோயில் உள்ளிட்ட முக்கிய கோயில்களிலும் இந்த நடைமுறை அமலுக்கு வருகிறது.
திருவண்ணாமலை அண்ணாமலையார் கோயிலுக்கும் நாளை முதல் பக்தர்கள் செல்போன் கொண்டு செல்ல தடை விதிக்கப்பட்டுள்ளது. கோயிலின் 4 பிரதான கோபுரங்களின் அருகே தற்காலிக செல்போன் வைப்பு பெட்டகங்கள் அமைக்கப்பட்டுள்ளன. செல்போனுக்கு ரூ.5 கட்டணம் செலுத்தி டோக்கன் பெற்றுக் கொள்ளலாம். இந்த உத்தரவை மீறி யாரேனும் செல்போனை மறைமுகமாக கோயிலுக்குள் எடுத்துச் சென்றால், அது பறிமுதல் செய்யப்படும் என்றும், அவர்கள் மீது காவல்துறை மூலம் உரிய நடவடிக்கை எடுக்கப்படும் என்றும் கோயில் நிர்வாகம் எச்சரித்துள்ளது.
ஏற்கனவே, தஞ்சை பெரிய கோயில், திருச்செந்தூர் சுப்பிரமணிய சுவாமி திருக்கோயில், ராமேஸ்வரம் ராமநாதசுவாமி கோயில் உள்ளிட்ட தமிழ்நாட்டின் முக்கிய கோயில்களில் இந்த நடைமுறை அமலில் உள்ளது. தஞ்சையில் உள்ள பெருவுடையார் கோயில் மற்றும் புன்னைநல்லூர் மாரியம்மன் திருக்கோயிலிலும் பக்தர்கள் செல்போன் கொண்டு வர தடை விதிக்கப்பட்டுள்ளது. கிழக்கு மற்றும் வடக்கு வாயில் அருகில் அமைக்கப்பட்டுள்ள கைபேசி பாதுகாப்பு மையங்களுக்கு ரூ. 5 கட்டணம் வசூலிக்கப்படும். ரசீதைக் காண்பித்து செல்போனை பெற்றுக் கொள்ளலாம்.
இந்த தடை சாதாரண பக்தர்களுக்கு மட்டுமின்றி, பிரபலங்கள் மற்றும் முக்கிய பிரமுகர்களுக்கும் பொருந்தும் என இந்து சமய அறநிலையத்துறை ஆணையர் வெளியிட்டுள்ள சுற்றறிக்கையில் தெரிவிக்கப்பட்டுள்ளது. கோயில் வளாகத்திற்குள் புகைப்படம் எடுக்கவோ, காணொளி பதிவு செய்யவோ அனுமதியில்லை. பிரபலங்கள் கோயிலுக்கு வருகை தருவது தெரியவந்தால், அவர்கள் வருவதற்கு குறைந்தது ஒரு நாள் முன்பாகவோ அல்லது தகவல் கிடைத்த உடனேயோ, வருகை நேரம், வருபவர்களின் எண்ணிக்கை உள்ளிட்ட முழு விவரங்களை ஆணையர் அலுவலகத்திற்கு கட்டாயம் தெரிவிக்க வேண்டும் என்றும் கூறப்பட்டுள்ளது.
