தமிழகத்தில் 21 வயதுக்குட்பட்ட நபர்களுக்கு மதுபானம் விற்பனை செய்யவோ, வழங்கவோ கூடாது என மது விலக்கு மற்றும் ஆயத்தீர்வை துறை அதிரடி உத்தரவு பிறப்பித்துள்ளது. சென்னை தலைமை செயலகத்தில் நடைபெற்ற மது விலக்கு மற்றும் ஆயத்தீர்வை துறை ஆய்வுக்கூட்டத்தில், துறை அமைச்சர் விக்னேஷ் தலைமையில் இந்த முக்கிய முடிவு எடுக்கப்பட்டது.
மது விலக்கு ஆயத்தீர்வை துறை ஆணையர் பூஜா குல்கர்னி வெளியிட்ட அறிக்கையின்படி, உரிமம் பெற்ற அனைத்து கிளப் மற்றும் நட்சத்திர ஹோட்டல் வளாகங்களில் இந்த புதிய விதிமுறைகள் அமல்படுத்தப்படும். ஒரு நபரின் வயது குறித்து சந்தேகம் எழுந்தால், அவரது வயதை உறுதி செய்ய உரிய ஆவணங்கள் சரிபார்க்கப்பட வேண்டும். மேலும், உரிமம் பெற்ற கிளப்கள் தங்களிடம் பதிவு செய்த உறுப்பினர்களுக்கு உறுப்பினர் அடையாள அட்டை வழங்க வேண்டும். அந்த உறுப்பினர்களுக்கும், தகுதியுடைய அவர்களின் விருந்தினர்களுக்கும் மட்டுமே மதுபானம் வழங்கப்பட வேண்டும். நிர்ணயிக்கப்பட்ட நேரத்தை கண்டிப்பாக கடைப்பிடிக்க வேண்டும் என்றும் வலியுறுத்தப்பட்டுள்ளது.
கிளப் நிர்வாகங்கள், கிளப் நிறுவப்பட்ட நோக்கங்களுக்கு ஏற்ப, பிற பொழுதுபோக்கு, கலாசாரம், விளையாட்டு, சமூக செயல்பாடுகள் தொடர்ந்து நடைபெறுவதை உறுதி செய்ய வேண்டும். இந்த உத்தரவுகளை அனைத்து உரிமதாரர்களும் கண்டிப்பாக பின்பற்ற வேண்டும். விதிமீறல் கண்டறியப்பட்டால், சம்பந்தப்பட்ட சட்டப் பிரிவுகளின் கீழ் உரிய நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.
இந்த புதிய கட்டுப்பாடுகள் மூலம், இளைஞர்கள் மத்தியில் மது அருந்தும் பழக்கத்தை கட்டுப்படுத்தவும், பொறுப்பான மதுபான பயன்பாட்டை ஊக்குவிக்கவும் தமிழக அரசு முனைப்பு காட்டி வருகிறது. இந்த உத்தரவுகள் முறையாக அமல்படுத்தப்படுவதை கண்காணிக்கவும் நடவடிக்கைகள் எடுக்கப்படும்.
