சட்டப்பேரவையில் சமூக நீதித்துறை மற்றும் பிற்படுத்தப்பட்டோர் நலத்துறை மானியக் கோரிக்கை விவாதத்தின்போது, தமிழ்நாடு அரசு பல்வேறு புதிய நலத்திட்டங்களை அறிவித்துள்ளது. இந்த அறிவிப்புகள், வீடற்றோர், மாணவர்கள், தூய்மைப் பணியாளர்கள் மற்றும் பழங்குடியினர் எனப் பலதரப்பட்ட மக்களின் வாழ்க்கைத் தரத்தை மேம்படுத்தும் நோக்கில் வெளியிடப்பட்டுள்ளன.
நேபாளத்தில் வெள்ளத்தால் பாதிக்கப்பட்ட தமிழர்களை மீட்கும் நடவடிக்கை குறித்து பள்ளிக் கல்வித்துறை அமைச்சர் ராஜ்மோகன் பதிலளித்ததைத் தொடர்ந்து, சமூக நீதித்துறை அமைச்சர் வன்னி அரசு 67 முக்கிய அறிவிப்புகளை வெளியிட்டார். இதில், விடுதி மாணவர்களுக்கான மாதாந்திர உணவுக் கட்டணம் உயர்த்தப்பட்டுள்ளது. பள்ளி விடுதி மாணவர்களுக்கு ரூ.1400-ல் இருந்து ரூ.1800 ஆகவும், கல்லூரி மாணவர்களுக்கு ரூ.1500-ல் இருந்து ரூ.2000 ஆகவும் கட்டணம் அதிகரிக்கப்பட்டுள்ளது. இதற்காக ரூ.200 கோடி நிதி ஒதுக்கீடு செய்யப்பட்டுள்ளது.
'உறையுள்' திட்டத்தின் கீழ், வீடற்ற பழங்குடியினருக்கு 2000 கான்கிரீட் வீடுகள் கட்டித் தரப்படும். மேலும், 'இனிய இல்லம்' திட்டத்தின் மூலம், தகுதியான ஆதிதிராவிடர் குடும்பங்களுக்கு 5000 கான்கிரீட் வீடுகள் ஊரக வளர்ச்சித் துறை மற்றும் தமிழ்நாடு நகர்ப்புற வாழ்விட மேம்பாட்டு வாரியம் மூலம் கட்டப்படும்.
மிகப்பிற்படுத்தப்பட்ட மக்களின் முன்னேற்றத்திற்காக, நடப்பாண்டில் ரூ.3 கோடி செலவில் 'மிகப்பிற்படுத்தப்பட்டோர் நல வாரியம்' புதியதாக உருவாக்கப்படும். தூய்மைப் பணியாளர்களின் பாதுகாப்பான குடியிருப்பை உறுதிசெய்யும் வகையில், 'அகம்' திட்டம் அறிமுகப்படுத்தப்பட்டு, வீடற்ற தூய்மைப் பணியாளர்களுக்கு 2500 கான்கிரீட் வீடுகள் வழங்கப்படும். மேலும், 'ஏற்றம்' என்ற திட்டத்தின் கீழ், தூய்மைப் பணியாளர் குடும்ப உறுப்பினர்களை தொழில் முனைவோராக மாற்ற ரூ.50 கோடி செலவில் வங்கி கடன் மற்றும் 20 சதவீத மானியத்துடன் உதவிகள் வழங்கப்படும்.
தனியார் நிறுவனங்களில் ஆதிதிராவிடர் மற்றும் பழங்குடியினரை அதிகளவில் பணியமர்த்த ஊக்குவிக்கும் வகையில் 'சரிநிகர்' சம வேலைவாய்ப்பு திட்டம் அறிமுகப்படுத்தப்படும். மலைப்பகுதிகளில் பழங்குடியின வாழ்விடங்களுக்கு அருகில், சுற்றுச்சூழலுக்கு உகந்த 'பூம்பொழில் தங்கும் வசதிகள்' ஏற்படுத்தப்படும். உள்ளூர் பழங்குடியின இளைஞர்களுக்கு வழிகாட்டி பயிற்சியும் வழங்கப்படும்.
ஆதிதிராவிடர் மற்றும் பழங்குடியினரின் விளைபொருட்களின் தனித்தன்மையை பாதுகாக்க புவிசார் குறியீடு பெற நடவடிக்கை எடுக்கப்படும். பள்ளி மற்றும் கல்லூரி விடுதிகளில் மாணவர்களின் கலை மற்றும் விளையாட்டுத் திறனை ஊக்குவிக்க 'சிறகுகள்' பல்திறன் குழுக்கள் உருவாக்கப்படும். மேலும், ஆதிதிராவிடர் மற்றும் பழங்குடியின மாணவர்களுக்காக ரூ.160 கோடியில் 150 சமூக நீதி விடுதிகள் கட்டப்படும்.
ஊடகத்துறையில் ஆதிதிராவிடர் மற்றும் பழங்குடியின இளைஞர்களின் திறனை மேம்படுத்த, இதழியல் மற்றும் தொடர்பியல் மாணவர்களுக்கு 'ஊடகத்திறன் ஊக்குவிப்பு திட்டம்' மூலம் பயிற்சி உதவித்தொகை வழங்கப்படும். சமூக நீதித்துறையின் கீழ் செயல்படும் பள்ளிகளுக்கு ரூ.30 கோடியில் 100 புதிய வகுப்பறைகள் கட்டப்படும். சொந்தமாக வீட்டுமனை இல்லாத ஆதிதிராவிடர் மற்றும் பழங்குடியினருக்கு 'சமத்துவ வீட்டு மனைத் திட்டம்' மூலம் மனை வழங்கப்படும்.
பழங்குடியின மக்களின் விளைபொருட்களை மதிப்பு கூட்ட, 25 மதிப்பு கூட்டல் அலகுகள் ரூ.12.50 கோடி மதிப்பில் நிறுவப்படும். இப்பொருட்கள் 'முல்லை' என்ற தனித்த அடையாளத்துடன் சந்தைப்படுத்தப்படும். சென்னையில் உள்ள நந்தனத்தில், மாணவர்களின் கல்வித்திறன் மற்றும் டிஜிட்டல் அறிவை மேம்படுத்த 'டிஜிட்டல் கற்றல் மற்றும் புதுமை மையம்' உருவாக்கப்படும். பழங்குடியின மக்களின் கலாச்சாரத்தை அறிய 'தடம்' பழங்குடியினர் மரபு நடை எனும் கலாச்சார பயண நிகழ்ச்சி ஐந்து மாவட்டங்களில் புதிதாக ஏற்படுத்தப்படும்.
விடுதிகளில் 'அம்பேத்கர் படிப்பகம்' ஏற்படுத்தப்பட்டு, மாணவர்களின் வாசிப்புப் பழக்கம் மற்றும் அறிவுத் தேடல் ஊக்குவிக்கப்படும். சமூக நீதி விடுதிகளின் ஆண்டு பராமரிப்புத் தொகை உயர்த்தப்பட்டுள்ளது. பள்ளி விடுதிகளுக்கு ரூ.50,000-லிருந்து ரூ.75,000 ஆகவும், கல்லூரி விடுதிகளுக்கு ரூ.50,000-லிருந்து ரூ.1 லட்சமாகவும் அதிகரிக்கப்பட்டுள்ளது. பழங்குடியின மொழிகளை அடுத்த தலைமுறைக்கு கொண்டு செல்ல சான்றிதழ் வகுப்புகள் நடத்தப்படும். இளைஞர்களின் விளையாட்டுத் திறனை மேம்படுத்த சிறப்பு விளையாட்டு திறன் மேம்பாட்டு திட்டங்களும் அறிவிக்கப்பட்டுள்ளன.
