தமிழ்நாட்டில் தனிநபர் கடன் சுமை ரூ. 1,28,934 ஆக உயர்ந்துள்ளது என்றும், வட்டி செலவினத்தால் மூலதன செலவு குறைந்து வருவதாகவும் நிதியமைச்சர் மரியவில்சன் தெரிவித்துள்ளார்.
தமிழகத்தின் நிதி மேலாண்மை குறித்த வெள்ளை அறிக்கையை தலைமைச் செயலகத்தில் வெளியிட்ட பிறகு செய்தியாளர்களிடம் பேசிய அவர், "கடந்த 5 ஆண்டுகளில் வட்டி செலவினம் 61 சதவீதம் அதிகரித்துள்ளது. சந்தை நிலவரத்தை பிரதிபலிக்கும் வகையில் வழிகாட்டு மதிப்புகள் திருத்தப்படவில்லை. சொத்துப்பதிவு மூலம் அரசுக்கு கிடைக்க வேண்டிய வருவாய் தொடர்ந்து இழக்கப்பட்டு வருகிறது. முத்திரைத்தாள் கட்டணம், சந்தை மதிப்பை விட குறைவாக உள்ளது. முந்தைய அரசு முதலீட்டுக்காக அல்லாமல், அன்றாட செலவுகளுக்காக கடன் வாங்கியுள்ளது. அரசு, வட்டி மட்டும் ஆண்டுக்கு ரூ.67,000 கோடி செலுத்துகிறது. கனிம வளத்துறையில் நடந்த ஊழல், வருவாய் இழப்புக்கு முக்கிய காரணமாக அமைந்துள்ளது" என்று கூறினார்.
கர்நாடகா, மராட்டியம், குஜராத் போன்ற மாநிலங்களுடன் ஒப்பிடுகையில் தமிழ்நாட்டின் மொத்த கடன் சதவீதம் அதிகமாக உள்ளது. திமுக ஆட்சியில் கடந்த 5 வருடங்களில் வாங்கப்பட்ட கடன், கடந்த 60 ஆண்டுகளில் வாங்கிய கடனை விட அதிகம். சொந்த வரி வருவாயில் மூன்றில் ஒரு பங்கு, கடனுக்கான வட்டிக்கே செல்கிறது. வட்டி மட்டும் ஆண்டுக்கு ரூ.67,000 கோடி செலுத்தப்படுகிறது. கடந்த 5 ஆண்டுகளில் ரூ.4.87 லட்சம் கோடி கடன் சேர்க்கப்பட்டுள்ளது. தமிழ்நாட்டில் பிறக்கும் ஒவ்வொரு குழந்தையும், பிற மாநிலங்களை விட மிக அதிகமான கடன் சுமையுடன் பிறக்கிறது.
2021ல் ரூ.5 லட்சம் கோடியாக இருந்த கடன், 2026ல் ரூ.10 லட்சம் கோடியாக உயர்ந்துள்ளது. கொரோனா தொற்று காலத்தை விட திமுக ஆட்சியில் வருவாய் பற்றாக்குறை அதிகமாக உள்ளது. திமுக ஆட்சியில் மாநிலத்தின் சொந்த வரி வருவாய் வரலாறு காணாத வீழ்ச்சியை சந்தித்துள்ளது. ஒரு காலத்தில் இந்தியாவில் அதிக வருவாய் கொண்ட மாநிலமாக திகழ்ந்த தமிழ்நாடு, தற்போது நாட்டின் சராசரியை விட வருவாயில் பின்தங்கியுள்ளது. தமிழ்நாட்டின் வருவாய் பற்றாக்குறை ரூ.78,324 கோடியாக உள்ளது. 2021ல் ரூ.46,538 கோடியாக இருந்த வருவாய்ப் பற்றாக்குறை, 2026ல் ரூ.78,324 கோடியாக அதிகரித்துள்ளது. மாநில மொத்த உள்நாட்டு உற்பத்தி மதிப்பில் வருவாய் பற்றாக்குறை வரம்பு மீறி அதிகரித்துள்ளது. மாநில மொத்த உள்நாட்டு உற்பத்தி மதிப்பில் மூலதனச் செலவினம் குறைந்துள்ளது. தமிழ்நாட்டின் மொத்த வருவாய் வரவில் வட்டிச் செலவினம் 22.8 சதவீதமாகவும், தவிர்க்க முடியாத செலவுகள் 64.4 சதவீதமாகவும் உள்ளது" என அவர் தெரிவித்தார்.
