சிவகங்கை மாவட்டம் மல்லல் அரசு மேல்நிலைப்பள்ளியில் 12-ம் வகுப்பு மாணவன் ஒருவன், சக மாணவனால் வகுப்பறையிலேயே கத்தியால் குத்தப்பட்ட சம்பவம் பெரும் அதிர்ச்சியை ஏற்படுத்தியுள்ளது. தனிப்பட்ட பகை காரணமாக இந்த தாக்குதல் நடைபெற்றதாகக் கூறப்படுகிறது. காயமடைந்த மாணவர் மருத்துவமனையில் அனுமதிக்கப்பட்டு சிகிச்சை பெற்று வருகிறார். இதுகுறித்து காவல்துறையினர் வழக்குப்பதிவு செய்து விசாரணை மேற்கொண்டுள்ளனர்.
இதேபோல், திருச்சி திருவெறும்பூர் அரசன்குடி அரசு மேல்நிலைப்பள்ளியில் 9-ம் வகுப்பு மாணவன் ஒருவன் மண்வெட்டியால் தாக்கப்பட்ட செய்தியும் வெளியாகி உள்ளது. இந்த இரு சம்பவங்களும் தமிழகத்தின் கல்விச் சூழல் குறித்து கடுமையான கவலையை ஏற்படுத்துவதாக பாஜக சட்டமன்ற உறுப்பினர் வானதி சீனிவாசன் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில், 'அரசுப் பள்ளிகள் என்றாலே சாதனை மாணவர்கள் என்ற நிலை மாறி, சமீப காலமாக தொடர்ந்து அவப் பெயரைப் பெற்று வருகின்றன. இதற்கு பள்ளிக் கல்வித்துறை மாணவர்கள் நலனில் காட்டும் அலட்சியப் போக்கே காரணம். கல்விக்கூடங்கள் அறிவை வளர்க்கும் இடங்களாக இருக்க வேண்டுமே தவிர, ஆயுதங்களும் வன்முறையும் நுழையும் இடங்களாக மாறக்கூடாது' என்று அவர் குறிப்பிட்டுள்ளார்.
மேலும், 'செல்லும் பள்ளிகளிலெல்லாம் ரீல்ஸ் எடுக்கும் ஆளுங்கட்சியினர், அதில் காட்டும் அக்கறையை மாணவர்கள் நலனில் காட்டியிருந்தாலே இதுபோன்ற சம்பவங்களைத் தவிர்த்திருக்கலாம்' என்றும் அவர் விமர்சித்துள்ளார்.
எனவே, அரசுப் பள்ளி மாணவர்களின் பாதுகாப்பை உறுதி செய்வதற்காக, பள்ளிகளில் மனநல ஆலோசனை, நன்னெறிக்கல்வி, மற்றும் மாணவர்களிடையே நட்பு மற்றும் சகிப்புத்தன்மையை வளர்க்கும் சிறப்பு விழிப்புணர்வு நிகழ்ச்சிகளை பள்ளிக் கல்வித்துறை துரித நடவடிக்கையாக செயல்படுத்த வேண்டும் என வானதி சீனிவாசன் வலியுறுத்தியுள்ளார்.
இந்த சம்பவங்கள் தமிழகத்தில் பள்ளிக் கல்வித்துறையின் செயல்பாடுகள் மற்றும் மாணவர்களின் பாதுகாப்பு குறித்த கேள்விகளை எழுப்பியுள்ளன. மாணவர்கள் கல்வி கற்க வரும் பள்ளிகள் பாதுகாப்பான சூழலைக் கொண்டிருக்க வேண்டியதன் அவசியத்தை இந்த நிகழ்வுகள் உணர்த்துகின்றன. கல்விக்கூடங்களில் வன்முறைச் சம்பவங்கள் தலைதூக்குவது கவலை அளிப்பதாகப் பலரும் கருத்து தெரிவித்து வருகின்றனர்.
