சிவகாசி அருகே நமஸ்கரித்தான்பட்டியில் உள்ள கிருஷ்ணா என்ற பட்டாசு ஆலையில் இன்று ஏற்பட்ட பயங்கர வெடி விபத்தில் மூன்று பேர் சம்பவ இடத்திலேயே உயிரிழந்தனர். மேலும் ஒருவர் படுகாயமடைந்துள்ளார்.
சிவகாசி சுற்றுவட்டாரப் பகுதிகளில் மத்திய மற்றும் மாநில அரசுகளின் உரிமம் பெற்று சுமார் 1000-க்கும் மேற்பட்ட சிறிய மற்றும் பெரிய பட்டாசு ஆலைகள் செயல்பட்டு வருகின்றன. நாட்டின் மொத்த பட்டாசு உற்பத்தியில் 90 சதவீதத்திற்கும் மேல் இங்குள்ள ஆலைகளில் உற்பத்தி செய்யப்படுகிறது. இதில் சுமார் 70 சதவீத பட்டாசுகள் பெரிய ஆலைகளில் தயாரிக்கப்படுகின்றன.
கடந்த ஆண்டு உரிமம் ரத்து செய்யப்பட்ட 80-க்கும் மேற்பட்ட பட்டாசு ஆலைகளுக்கு இந்த ஆண்டும் உற்பத்தி அனுமதி வழங்கப்படவில்லை. மேலும், இந்த ஆண்டு 200-க்கும் அதிகமான பட்டாசு ஆலைகளில் உற்பத்திக்கு தடை விதிக்கப்பட்டது.
பட்டாசு ஆலைகள் மூடப்பட்டதால் 10 ஆயிரத்துக்கும் மேற்பட்ட தொழிலாளர்கள் வேலை இழந்துள்ளதாக கூறி, தொழிலாளர்கள் மற்றும் உற்பத்தியாளர் சங்கங்கள் சார்பில் தொடர்ச்சியாக போராட்டங்கள் நடைபெற்றன. பட்டாசு ஆலைகளை திறக்க வலியுறுத்தியும், ஆய்வுகளை கண்டித்தும் சிறு பட்டாசு ஆலை உரிமையாளர் சங்கம் சார்பில் ஆகஸ்ட் 12-ம் தேதி முதல் காலவரையற்ற வேலை நிறுத்தமும் அறிவிக்கப்பட்டிருந்தது.
இந்நிலையில், சிவகாசி தொகுதி எம்.எல்.ஏ.வும், தொழில்துறை அமைச்சருமான கீர்த்தனா, தனது சமூக வலைதளப் பக்கத்தில் ஒரு பதிவை வெளியிட்டிருந்தார். அதில், 'தொடர் விபத்துகளையும் உயிரிழப்புகளையும் தடுப்பதற்காகவே ஆய்வுகள் நடைபெறுகின்றன. உங்கள் பாதுகாப்புதான் எங்களுக்கு முக்கியம், யாரும் கவலைப்பட வேண்டாம். சிவகாசியின் உயிர்நாடியான பட்டாசு தொழிலும், மக்களின் வாழ்வாதாரமும் பாதுகாக்கப்பட வேண்டும் என்பதில் நாங்கள் உறுதியாக உள்ளோம்' என்று குறிப்பிட்டிருந்தார்.
இந்தச் சூழலில், சிவகாசி அருகே நமஸ்கரித்தான்பட்டியில் உள்ள கிருஷ்ணா என்ற பட்டாசு ஆலையில் இன்று எதிர்பாராதவிதமாக வெடி விபத்து ஏற்பட்டது. இந்த கோர விபத்தில் சிக்கி மூன்று பேர் பரிதாபமாக உயிரிழந்தனர். மேலும் ஒருவர் பலத்த காயமடைந்துள்ளார்.
சம்பவம் குறித்து தகவலறிந்ததும், உடனடியாக காவல்துறையினரும் தீயணைப்புத் துறையினரும் சம்பவ இடத்துக்கு விரைந்து மீட்புப் பணிகளை மேற்கொண்டனர். இந்த வெடி விபத்துக்கான காரணம் குறித்து காவல்துறையினர் தீவிர விசாரணை மேற்கொண்டு வருகின்றனர்.
