ஆப்கானிஸ்தானுக்கு எதிரான டெஸ்ட் போட்டியில் இந்திய கேப்டன் சுப்மன் கில், டெஸ்ட் கிரிக்கெட் வரலாற்றில் கேப்டனாக மிகச் சிறந்த பேட்டிங் சராசரி கொண்ட வீரர்கள் பட்டியலில் ஜாம்பவான் டான் பிராட்மேனுக்கு அடுத்தபடியாக இரண்டாவது இடத்தைப் பிடித்து புதிய உலக சாதனை படைத்துள்ளார். சண்டிகரின் முல்லன்பூர் மைதானத்தில் நடந்த இந்தப் போட்டியில், முதல் நாளில் 103 ரன்களுடன் ஆட்டமிழக்காமல் இருந்த சுப்மன் கில், இரண்டாம் நாள் ஆட்டத்தில் 177 பந்துகளில் 126 ரன்கள் குவித்து ஆட்டமிழந்தார். இதன் மூலம், டெஸ்ட் கேப்டனாக தனது ரன் குவிப்பை 1076 ஆக உயர்த்தியுள்ளார், இதில் அவரது பேட்டிங் சராசரி 82.8 ஆக உள்ளது.
டெஸ்ட் கிரிக்கெட் வரலாற்றில் 1000 ரன்களுக்கு மேல் குவித்த கேப்டன்களில், ஆஸ்திரேலியாவின் ஜாம்பவான் டான் பிராட்மேனுக்கு அடுத்தபடியாக மிகச் சிறந்த சராசரியைக் கொண்ட இரண்டாவது கேப்டன் என்ற பெருமையை சுப்மன் கில் பெற்றுள்ளார். டான் பிராட்மேன் கேப்டனாக 101.5 சராசரியில் 3147 ரன்கள் குவித்துள்ளார். இந்தச் சாதனையில் கில்லுக்கு அடுத்த இடங்களில் குமார் சங்கக்காரா (1601 ரன்கள், 69.6 சராசரி), ஸ்டீவ் ஸ்மித் (4425 ரன்கள், 68.1 சராசரி) மற்றும் மஹேலா ஜெயவர்த்தனே (3665 ரன்கள், 59.1 சராசரி) ஆகியோர் உள்ளனர்.
மேலும், ஒரே ஆண்டில் 1000 டெஸ்ட் ரன்களைக் கடந்த முதல் இந்திய ஆண்கள் அணி கேப்டன் என்ற வரலாற்றுச் சாதனையையும் சுப்மன் கில் நேற்று படைத்துள்ளார். இதனிடையே, இரண்டாம் நாள் ஆட்டத்தின் முதல் பகுதியில், நேற்று 50 ரன்களுடன் களத்தில் இருந்த விக்கெட் கீப்பர் ரிஷப் பண்ட் சதம் அடிப்பார் என எதிர்பார்க்கப்பட்ட நிலையில், 81 ரன்கள் எடுத்து ஆட்டமிழந்தார். அவரைத் தொடர்ந்து களமிறங்கிய மற்றொரு விக்கெட் கீப்பர் பேட்ஸ்மேனான துருவ் ஜூரல் 19 ரன்களுக்கு ஆட்டமிழந்து ஏமாற்றினார்.
ஆட்டத்தின் இரண்டாம் நாள் மதிய உணவு இடைவேளையின் போது இந்திய அணி தனது முதல் இன்னிங்ஸில் 110 ஓவர்களில் 6 விக்கெட் இழப்பிற்கு 475 ரன்கள் எடுத்து வலுவான நிலையில் உள்ளது. தற்போதைய ரன் ரேட் 4.32 ஆகும். வாஷிங்டன் சுந்தர் மற்றும் அறிமுக வீரர் மானவ் சுதார் ஆகியோர் களத்தில் உள்ளனர்.
