வரவிருக்கும் இடைத்தேர்தலில் நிச்சயம் வெற்றி பெற்று தமிழக சட்டமன்றத்திற்குள் நுழைவேன் என்று நாம் தமிழர் கட்சி தலைமை ஒருங்கிணைப்பாளர் சீமான் உறுதியளித்துள்ளார். அதிமுக மற்றும் திமுகவின் ஆதரவுடன், அம்பாசமுத்திரம் சட்டமன்றத் தொகுதியில் பொது வேட்பாளராக சீமான் போட்டியிட உள்ளதாக தகவல்கள் தெரிவிக்கின்றன. சமீப காலமாக திமுகவுடன் நெருக்கம் காட்டி வரும் சீமானின் இந்த நடவடிக்கை, அவரது வேட்பு மனுவை மேலும் வலுப்படுத்துவதாக அமைந்துள்ளது. திமுக மற்றும் தனது நாடார் சமூக வாக்குகளைக் குறிவைத்து சீமான் இந்த தொகுதியில் போட்டியிடுகிறார். அவரது தேர்தல் செலவுகள் முழுவதையும் முன்னாள் அமைச்சர் அனிதா ராதாகிருஷ்ணன் ஏற்பதாக கூறப்படுகிறது. தொடர்ந்து ஏழு முறை வெற்றி பெற்ற அனிதா ராதாகிருஷ்ணன், சீமானை எப்படியாவது சட்டமன்ற உறுப்பினராக்கி விடுவேன் என்று உறுதி அளித்துள்ளார். அந்த நம்பிக்கையின் பேரில்தான், விரைவில் சட்டசபைக்குள் செல்வேன் என்று சீமான் மேடைதோறும் பேசி வருகிறார். எனினும், இந்த தொகுதியில் முன்னாள் எம்எல்ஏ இசக்கி சுப்பையாவை வீழ்த்துவது என்பது மிகவும் கடினமான காரியம் என கள யதார்த்தம் நிலவுகிறது. கடந்த தேர்தலில் நாம் தமிழர் கட்சி இந்த தொகுதியில் 10 ஆயிரத்துக்கும் மேற்பட்ட வாக்குகளைப் பெற்றுள்ளது. இந்த முறை கூடுதல் வாக்குகள் கிடைக்கும் என்ற நம்பிக்கையில் சீமான் களம் இறங்குகிறார். இந்த தொகுதியில் வெற்றி பெற்று சீமான் சாதிப்பாரா அல்லது சறுக்குவாரா என்பதை பொறுத்திருந்துதான் பார்க்க வேண்டும்.
