திமுக அமைப்புச் செயலாளர் ஆர்.எஸ்.பாரதி, தற்போதைய ரெய்டுகளை ஒரு பொருட்டாக கருதவில்லை என்றும், இதைவிட மோசமான ரெய்டுகளையும் தாங்கள் பார்த்தவர்கள் என்றும் தெரிவித்துள்ளார்.
சென்னையில் செய்தியாளர்களைச் சந்தித்த அவர், "தவெக அரசு ஆட்சிக்கு வந்ததில் இருந்து தமிழ்நாட்டின் சட்டம் ஒழுங்கு சீர்குலைந்துவிட்டது. ஆனால், இதற்கெல்லாம் பொறுப்பேற்காமல், திமுக மீது பழியைச் சுமத்தி விஷயங்களைத் திசைதிருப்புகிறது இந்த அரசு. மேலும், காவல்துறையை ஏவி எதிர்க்கட்சியினர் மீது அடக்குமுறையைக் கையாள்கிறது" என்று குற்றம் சாட்டினார்.
தவெக அரசின் மீதான மக்களின் அதிருப்தியை திசைதிருப்பவே எதிர்க்கட்சியினர் மீது ரெய்டு நாடகம் நடத்தப்படுவதாகவும் அவர் கூறினார். "இது என்ன ரெய்டு? இதைவிட மோசமான ரெய்டுகளை எல்லாம் பார்த்தவர்கள் நாங்கள். பத்தோடு பதினொன்று அவ்வளவுதான். 50 வருடங்களாகப் பல்வேறு ரெய்டுகளை நாங்கள் சந்தித்திருக்கிறோம். ஆனால், எந்தக் குற்றச்சாட்டும் நிரூபிக்கப்படவில்லை என்பதுதான் வரலாறு. இது எங்களுக்கு 50-உடன் 51-ஆவது ரெய்டு, அவ்வளவுதான். எமர்ஜென்சி காலத்திலிருந்தே இதுபோன்ற ரெய்டுகளைப் பார்த்து வருகிறோம். இதெல்லாம் ஒருநாள் செய்திதான்" என்று அவர் குறிப்பிட்டார்.
உள்ளாட்சித் தேர்தலுக்கு முன்னதாக இன்னும் எத்தனை ரெய்டுகள் நடத்தப்படுமோ என்று அவர் கேள்வி எழுப்பினார். இருப்பினும், தளபதி மு.க.ஸ்டாலினின் சாதனைகளை மக்கள் இப்போது உணரத் தொடங்கிவிட்டதாகவும் அவர் நம்பிக்கை தெரிவித்தார்.
மேலும், தவெக அமைச்சர்கள் மற்றும் எம்.எல்.ஏ.க்கள் செய்துகொண்டிருக்கும் ஊழல் தொடர்பான ஆதாரங்கள் தங்களிடம் வந்து கொண்டிருப்பதாகவும், அதனை உரிய நேரத்தில் வெளிப்படுத்துவோம் என்றும் ஆர்.எஸ்.பாரதி உறுதியளித்தார்.
அவரது இந்தப் பேச்சு, தற்போதைய அரசியல் சூழலில் முக்கியத்துவம் பெற்றுள்ளது. திமுக மீதான தொடர் ரெய்டுகளுக்கு அவர் தக்க பதிலடி கொடுத்துள்ளார்.
