தற்போதைய த.வெ.க ஆட்சியில் புதிய திட்டங்களோ அல்லது அதற்கான யோசனைகளோ எதுவும் இல்லை என்றும், இரண்டு மாதங்களாக புதிதாக எதையும் செய்ய முடியாமல் திமுக ஆட்சியின் திட்டங்களின் பெயர்களை மாற்றி வருகின்றனர் என்றும் திமுக அமைப்புச் செயலாளர் ஆர்.எஸ்.பாரதி குற்றம் சாட்டியுள்ளார்.
சென்னையில் செய்தியாளர்களை சந்தித்த அவர் மேலும் கூறுகையில், தமிழ்நாட்டில் த.வெ.க ஆட்சி அமைந்தது முதல் உருப்படியாக எதுவும் செய்யவில்லை. விபத்து காரணமாக ஆட்சிக்கு வந்துவிட்டதால், செய்வதறியாது திட்டங்களின் பெயர்களை மாற்றி வருவதாக தெரிவித்தார்.
முதலமைச்சரின் காலை உணவுத் திட்டம் உலகம் முழுவதும் புகழ்பெற்றது என்றும், வெளிநாடுகளில் கூட இந்தத் திட்டங்களைப் பின்பற்றினார்கள் என்றும் ஆர்.எஸ்.பாரதி குறிப்பிட்டார். திட்டங்களின் பெயரை மாற்றுவதால் அவை மறைந்துவிடும் என்று நினைப்பது அதைவிட முட்டாள்தனமான செயல் என்றும் அவர் கூறினார்.
மேலும், தங்களுக்கு காமராஜர் விரோதி இல்லை என்றும், காலை உணவுத் திட்டத்தில் சாப்பிடும் குழந்தைகள் தளபதியின் பெயரைத்தான் சொல்கின்றனர் என்றும் அவர் தெரிவித்தார்.
மின்சார வாரியத்தின் செயல்பாடுகள் குறித்தும் அவர் கேள்வி எழுப்பினார். மக்கள் பணத்தை திருடி மின்சார வாரியத்தை நடத்துகிறார்களா என்றும், பில் தொகையில் தவறு ஏற்பட்டால் அதை திருப்பி கொடுக்க வேண்டியதுதானே என்றும் அவர் கேட்டார். கழிப்பது என்றால் என்ன அர்த்தம் என்றும், இது ஒரு மோசடி வேலை என்றும் அவர் குற்றம் சாட்டினார்.
செந்தில் பாலாஜியை பழி வாங்கும் நோக்கில் அவர் மீது வழக்கு போடுகின்றனர் என்றும், வழக்கு போடுவதால் யாரையும் அழித்துவிட முடியாது என்றும் ஆர்.எஸ்.பாரதி கூறினார்.
இந்த ஆட்சி பொறுப்பேற்று இரண்டு மாதங்கள் ஆகிவிட்ட நிலையில், மக்களுக்கான எந்தவொரு புதிய திட்டத்தையும் அறிவிக்கவில்லை. மாறாக, திமுக ஆட்சியின் போது தொடங்கப்பட்ட திட்டங்களின் பெயர்களை மாற்றுவதில் மட்டுமே இந்த அரசு கவனம் செலுத்தி வருவதாக அவர் விமர்சித்தார்.
திட்டங்களின் பெயர்களை மாற்றுவது என்பது ஒரு தற்காலிகமான செயல் என்றும், அது மக்களின் மனதில் இருந்து திட்டங்களின் நன்மைகளை மறைத்துவிடாது என்றும் அவர் உறுதியாகத் தெரிவித்தார். காலை உணவுத் திட்டத்தின் வெற்றிக்கு குழந்தைகள் மத்தியில் உள்ள வரவேற்பே சான்று என்றும் அவர் சுட்டிக்காட்டினார்.
