இந்திய கிரிக்கெட் அணியின் மூத்த வீரர் ரோஹித் சர்மாவுக்கு, 15 வயது இளம் வீரர் வைபவ் சூரியவன்ஷியின் அபார வளர்ச்சி பெரும் சவாலாக அமையும் என இங்கிலாந்து முன்னாள் சுழற்பந்து வீச்சாளர் கிரேம் ஸ்வான் எச்சரிக்கை விடுத்துள்ளார். இதனால், ரோஹித் தனது அணியில் இடத்தைத் தக்கவைத்துக் கொள்ள கடுமையாகப் போராட வேண்டியிருக்கும்.
விராட் கோலி மற்றும் ரோஹித் சர்மா ஆகியோர் கடந்த ஆண்டு டெஸ்ட் கிரிக்கெட்டிலிருந்து ஓய்வு பெற்றனர். தற்போது ஒருநாள் போட்டிகளில் மட்டுமே கவனம் செலுத்தி வரும் இவர்கள், 2027 ஒருநாள் உலகக் கோப்பையை வெல்லும் முனைப்பில் உள்ளனர். இருப்பினும், வயது மற்றும் ஃபார்ம் காரணமாக இருவரும் தொடர்ச்சியான விமர்சனங்களை எதிர்கொண்டு வருகின்றனர்.
சமீபத்தில் நடந்து முடிந்த ஐபிஎல் 2026 தொடரில் 776 ரன்கள் குவித்து அசத்திய 15 வயது இளம் வீரர் வைபவ் சூரியவன்ஷி, அயர்லாந்து தொடரில் இந்திய அணிக்காக அறிமுகமாக உள்ளார். இது ரோஹித் சர்மாவுக்கு அணியில் கூடுதல் நெருக்கடியை ஏற்படுத்தியுள்ளது. இது குறித்து கிரேம் ஸ்வான் கூறுகையில், 'கிரிக்கெட் வாழ்க்கையின் இறுதிப் பகுதியில் இருக்கும் எந்தவொரு வீரருக்கும் மாற்று வீரரைத் தேடுவது இயல்பானது. ஒன்று அல்லது இரண்டு போட்டிகளில் ரோஹித் சொதப்பினால், அவருக்குப் பின்னால் இருக்கும் சூரியவன்ஷி போன்ற இளம் வீரர்களை நோக்கி அனைவரும் பார்க்கத் தொடங்கிவிடுவார்கள். எனவே, அடுத்த 6 வாரங்கள் ரோஹித் சர்மாவுக்கு மிகவும் முக்கியமானவை' என்று தெரிவித்தார்.
மேலும், ஐபிஎல் தொடரில் ரோஹித் சர்மா சிறந்த ஃபார்மில் காணப்பட்டார். வரும் ஜூலை மாதம் இங்கிலாந்திற்கு எதிரான ஒருநாள் தொடரில் இந்தியா விளையாட உள்ளது. அங்கு வெள்ளைப்பந்து பேட்டிங் செய்ய வானிலை சாதகமாக இருக்கும். இந்த சவால் ரோஹித்தை மேலும் ஆபத்தான பேட்ஸ்மேனாக மாற்றும் என்றும் ஸ்வான் கூறியுள்ளார்.
