2026 ஐபிஎல் தொடரின் முதல் குவாலிபையர் ஆட்டத்தில் ராயல் சேலஞ்சர்ஸ் பெங்களூரு மற்றும் குஜராத் டைட்டன்ஸ் அணிகள் இன்று மோதுகின்றன. இமாச்சலப் பிரதேசத்தின் தரம்சாலாவில் நடைபெறும் இந்தப் போட்டியில் வெற்றி பெறும் அணி, நேரடியாக இறுதிப்போட்டிக்குத் தகுதி பெறும். தோல்வியடையும் அணிக்கு இறுதிப்போட்டிக்குச் செல்ல மற்றொரு வாய்ப்பு கிடைக்கும்.
நடப்பு சீசனில் இரு அணிகளும் தலா 14 போட்டிகளில் விளையாடி 9 வெற்றிகளுடன் 18 புள்ளிகளைப் பெற்றுள்ளன. இருப்பினும், ரன் ரேட் அடிப்படையில் பெங்களூரு முதலிடத்திலும், குஜராத் இரண்டாம் இடத்திலும் குவாலிபையர் 1 சுற்றுக்கு முன்னேறியுள்ளன. கடந்த ஆண்டு சாம்பியன் பட்டம் வென்ற பெங்களூரு அணி, ரஜத் படிதார் தலைமையில் கோப்பையைத் தக்கவைக்கும் முனைப்பில் உள்ளது. சுப்மன் கில் தலைமையிலான குஜராத் டைட்டன்ஸ் அணி, தனது சொந்த மைதானமான அகமதாபாத் மைதானத்திற்கு நேரடியாகச் செல்ல முயல்கிறது.
இந்தப் போட்டியின் முக்கிய ஈர்ப்பாக விராட் கோலி மற்றும் சுப்மன் கில் இடையேயான பேட்டிங் மோதல் அமையும். குஜராத் கேப்டன் கில் 13 போட்டிகளில் 616 ரன்களுடன் அதிக ரன் எடுத்தவர்கள் பட்டியலில் இரண்டாம் இடத்தில் உள்ளார். விராட் கோலி 14 போட்டிகளில் 557 ரன்களைக் குவித்து சிறப்பான ஃபார்மில் உள்ளார். இரு அணிகளின் வேகப்பந்து வீச்சாளர்களிடையே கடும் போட்டி நிலவும் என எதிர்பார்க்கப்படுகிறது. பெங்களூரு அணியில் புவனேஷ்வர் குமார் மற்றும் ஜோஷ் ஹேசில்வுட், குஜராத் அணியில் ககிசோ ரபாடா மற்றும் முகமது சிராஜ் ஆகியோர் மிரட்டத் தயாராக உள்ளனர்.
தரம்சாலா ஆடுகளம் வேகப்பந்து வீச்சுக்குச் சாதகமானது. மாலை நேரத்தில் பனிப்பொழிவு இருக்கும் என்பதால், டாஸ் வெல்லும் அணி முதலில் பந்துவீச்சைத் தேர்வு செய்ய அதிக வாய்ப்புள்ளது. ரன் மழை பொழியும் இந்த மைதானத்தில் முதல் இன்னிங்ஸ் சராசரி ஸ்கோர் 187 ஆக உள்ளது. காயத்தில் இருந்து மீண்ட அதிரடி வீரர் பில் சால்ட் மீண்டும் பெங்களூரு அணியில் களம் இறங்க வாய்ப்புள்ளது. நட்சத்திர வீரர்களின் அணிவகுப்பால் இன்றைய ஆட்டம் அனல் பறக்கும் என்பதில் சந்தேகமில்லை.
