ராயல் சேலஞ்சர்ஸ் பெங்களூரு (RCB) அணியை வாங்குவதற்கு ஆதித்யா பிர்லா குழுமத்தின் ஆர்யமன் பிர்லா தலைமையிலான குழுவுக்கு இந்திய போட்டி ஆணையம் (CCI) அனுமதி வழங்கியுள்ளது. இந்த குழுவில் போல்ட் வென்ச்சர்ஸ், பிளாக்ஸ்டோன் மற்றும் டைம்ஸ் இன்டர்நெட் லிமிடெட் போன்ற நிறுவனங்கள் இடம்பெற்றுள்ளன. டயஜியோ நிறுவனத்திடம் இருந்து இந்த ஐபிஎல் அணியை வாங்குவதற்கான ஒப்பந்தம் இது. இதற்காக இந்த ஆண்டின் தொடக்கத்தில் சுமார் 1.78 பில்லியன் அமெரிக்க டாலர் (சுமார் ₹16,700 கோடி) ரொக்க ஏலம் கேட்கப்பட்டது.
இந்த விற்பனைக்கு பிசிசிஐ (BCCI) இன்னும் முறைப்படி ஒப்புதல் அளிக்க வேண்டியுள்ளது. அதற்கு முன்னர், பங்குகள் வைக்கும் முறை மற்றும் வங்கி உத்தரவாதங்களை பிசிசிஐ ஆய்வு செய்யும். இதற்கான நிதி சார்ந்த தணிக்கை இந்த மாதத்தில் தொடங்குகிறது. அக்டோபர் மாதத்திற்குள் இதற்கான அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. தற்போதைய நிலையில் இது ஒரு சாதாரண நடைமுறை என கூறப்படுகிறது.
ஆதித்யா பிர்லா குழுமம் இந்த அணியை பிக் பனியன் ஹோல்டிங்ஸ் என்ற நிறுவனத்தின் கீழ் நிர்வகிக்கும். இந்த குழுமம் உலோகம், சிமெண்ட், ஃபேஷன் மற்றும் சில்லறை வர்த்தகம் என பல்வேறு துறைகளில் செயல்பட்டு வருகிறது. மேலும், இந்த குழுமம் ஏற்கனவே ஆர்சிபி மற்றும் ராஜஸ்தான் ராயல்ஸ் அணிகளுக்கு ஸ்பான்சராக இருந்துள்ளது. கடந்த ஐபிஎல் 2026 தொடரில், இவர்களின் ரியல் எஸ்டேட் நிறுவனமான பிர்லா எஸ்டேட்ஸ், குஜராத் டைட்டன்ஸ் அணிக்கு ஸ்பான்சராக செயல்பட்டது.
இந்த குழுவில் உள்ள மற்றொரு முக்கிய நிறுவனமான போல்ட் வென்ச்சர்ஸ், பிரபல விளையாட்டு முதலீட்டாளர் டேவிட் பிளிட்சருக்கு சொந்தமானது. இவர் உலகளவில் பல விளையாட்டு அணிகளில் பங்குகளை வைத்துள்ளார். பிரீமியர் லீக்கின் கிரிஸ்டல் பேலஸ், என்.பி.ஏ-வின் பிலடெல்பியா 76அர்ஸ், என்.எச்.எல்-இன் நியூ ஜெர்சி டெவில்ஸ் போன்ற அணிகள் இதில் அடங்கும். பிளாக்ஸ்டோன் நிறுவனம் உலகின் மிகப்பெரிய சொத்து மேலாண்மை நிறுவனங்களில் ஒன்றாகும். மற்றொரு நிறுவனமான டைம்ஸ் இன்டர்நெட் லிமிடெட், சத்யன் கஜ்வானி தலைமையில் இயங்கும் ஒரு முன்னணி ஊடக நிறுவனம் ஆகும்.
இந்த விற்பனை நடைமுறைகள் கடந்த நவம்பர் 2025 இல் தொடங்கின. அப்போது டயஜியோ நிறுவனம் தங்களுக்கு தேவையில்லாத சில சொத்துக்களை விற்க முடிவு செய்தது. அதில் ஆர்சிபி அணியும் ஒன்றாக இருந்தது. இந்த அணியை வாங்க கடுமையான போட்டி நிலவியது. மான்செஸ்டர் யுனைடெட் அணியின் உரிமையாளர்களான கிளேசர்ஸ் குடும்பம் மற்றும் சீரம் இன்ஸ்டிடியூட் நிறுவனத்தின் ஆதார் பூனவல்லா ஆகியோர் இந்த போட்டியில் இருந்தனர். தற்போதைய நிலையில், ஆதார் பூனவல்லா மற்றொரு குழுவோடு இணைந்துள்ளார். லட்சுமி மிட்டல் தலைமையிலான அந்த குழு, ராஜஸ்தான் ராயல்ஸ் அணியை 1.65 பில்லியன் அமெரிக்க டாலருக்கு வாங்கியுள்ளது.
கடந்த மாதம் சென்னை சூப்பர் கிங்ஸ் மற்றும் மும்பை இந்தியன்ஸ் அணிகளுக்கு பிறகு, அடுத்தடுத்து ஐபிஎல் கோப்பைகளை வென்ற மூன்றாவது அணி என்ற சாதனையை ஆர்சிபி படைத்தது. ஆர்சிபி அணியின் பெரும் புகழுக்கு முக்கிய காரணமாக விராட் கோலி இருக்கிறார். அவர் இன்னும் மூன்று முதல் நான்கு ஆண்டுகள் தொடர்ந்து விளையாடுவார் என்று கடந்த மாத இறுதியில் அந்த அணியின் சிஇஓ ராஜேஷ் மேனன் தெரிவித்து இருந்தார். ஆர்சிபி ஆண்கள் அணி இரண்டு ஐபிஎல் கோப்பைகளை வென்றுள்ளது. அதேபோல, ஸ்மிருதி மந்தனா தலைமையிலான ஆர்சிபி மகளிர் அணி இரண்டு முறை (2024 மற்றும் 2026) மகளிர் பிரீமியர் லீக் (WPL) கோப்பைகளை வென்றுள்ளது.
