இந்திய கிரிக்கெட் அணியில் இருந்து திடீரென ஓய்வு பெற்ற முன்னாள் டெஸ்ட் விக்கெட் கீப்பர் கே.எஸ். பாரத், வெறும் 15 நாட்களிலேயே ஐக்கிய அரபு அமீரகத்தின் உள்ளூர் தொடரில் விளையாட ஒப்பந்தமாகியுள்ளார். 32 வயதில் அவர் எடுத்துள்ள இந்த முடிவு கிரிக்கெட் உலகில் பெரும் விவாதத்தை ஏற்படுத்தியுள்ளது.
கடந்த ஜூன் 4 ஆம் தேதி தனது ஓய்வு முடிவை அறிவித்த பாரத், அதற்கான காரணத்தை அப்போது வெளியிடவில்லை. இந்நிலையில், அமீரக கிரிக்கெட் வாரியம் நடத்தும் உள்ளூர் இருநாள் வெள்ளைப்பந்து சாம்பியன்ஷிப் தொடரில் ஸ்டாலியன்ஸ் அணிக்காக அவர் விளையாட உள்ளார். ரிஷப் பண்ட் விபத்தில் சிக்கியபோது இந்திய டெஸ்ட் அணியில் இடம்பிடித்த பாரத், 7 டெஸ்ட் போட்டிகளில் விளையாடி 221 ரன்களும், 18 கேட்சுகளும் எடுத்துள்ளார். மேலும், ரஞ்சி கோப்பையில் 308 ரன்கள் குவித்து முச்சதம் அடித்த முதல் விக்கெட் கீப்பர் என்ற பெருமையும் இவருக்கு உண்டு.
வீரர்களின் நீண்ட வடிவ ஆட்டத்திறனை மேம்படுத்தும் நோக்கில் வடிவமைக்கப்பட்டுள்ள இந்த அமீரக தொடரில், ஒரு நாளைக்கு 80 ஓவர்கள் வீசப்படும். இந்த புதிய சவாலை எதிர்கொள்ள பாரத் தயாராகி வருகிறார். பொதுவாக, இந்திய கிரிக்கெட்டில் இருந்து ஓய்வு பெறுபவர்கள் டி20 லீக் தொடர்களில் விளையாடுவதே வழக்கம். ஆனால், பாரத் ஐக்கிய அரபு அமீரக உள்ளூர் போட்டிகளில் விளையாட ஒப்பந்தமாகியுள்ளது சர்வதேச கிரிக்கெட் விதிகளின்படி சாத்தியமே.
இருப்பினும், சர்வதேச கிரிக்கெட் கவுன்சிலின் (ஐசிசி) விதிகளின்படி, ஒரு முழுநேர உறுப்பினர் நாட்டில் இருந்து மற்றொரு அசோசியேட் நாட்டிற்கு மாறும் வீரர்களுக்கு 3 ஆண்டுகள் காத்திருப்பு காலம் உண்டு. பாரத் தனது கடைசி சர்வதேச போட்டியை கடந்த பிப்ரவரி 2024 இல் இங்கிலாந்துக்கு எதிராக விளையாடினார். எனவே, அவர் 2027 பிப்ரவரிக்குப் பிறகுதான் ஐக்கிய அரபு அமீரக தேசிய அணிக்கு தேர்வு செய்ய தகுதி பெறுவார். அவர் அந்நாட்டுக்காக விளையாட திட்டமிட்டுள்ளாரா அல்லது பல்வேறு டி20 லீக் தொடர்களில் மட்டும் கவனம் செலுத்தவுள்ளாரா என்பது விரைவில் தெரியவரும்.
