தமிழக அரசுப் பள்ளிகளில் மாணவர்களுக்கு வழங்கப்படும் காலை உணவின் தரத்தை உறுதிசெய்யும் வகையில், விநியோகிக்கும் முன் ஆசிரியர்கள் பரிசோதனை செய்ய வேண்டும் என பள்ளிக் கல்வித்துறை அறிவுறுத்தியுள்ளது. இந்த உத்தரவு அனைத்து மாவட்ட கல்வி அலுவலர்களுக்கும் அனுப்பப்பட்டுள்ளது.
காமராஜர் காலை உணவு திட்டத்தின் கீழ், ஒன்றாம் வகுப்பு முதல் எட்டாம் வகுப்பு வரையிலான மாணவர்களுக்கு காலை உணவு வழங்கப்பட்டு வருகிறது. இந்தத் திட்டத்தின் முக்கிய நோக்கமே, மாணவர்களுக்கு சமைத்து வழங்கப்படும் உணவு சத்தானதாகவும், உடல் நலத்திற்கு உகந்ததாகவும் இருப்பதை உறுதி செய்வதாகும்.
எனவே, சமைக்கப்பட்ட உணவை மாணவர்களுக்குப் பரிமாறுவதற்கு முன்னர், அதன் தரம் மற்றும் சத்துக்களை ஆசிரியர்கள் பரிசோதித்து உறுதி செய்ய வேண்டும். அதன் பின்னரே மாணவர்களுக்கு உணவு வழங்கப்பட வேண்டும். பள்ளித் தலைமை ஆசிரியர்கள், மாணவர்கள் உணவு உண்பதை நேரடியாகக் கண்காணிக்கும் பொறுப்பை ஏற்க வேண்டும்.
மேலும், பள்ளியின் சமையலறையை எப்போதும் தூய்மையாகப் பராமரிக்க வேண்டும் என்றும், சமையல் பொருட்கள் தவிர வேறு எந்தப் பொருட்களையும் சமையலறையில் வைக்கக் கூடாது என்றும் அறிவுறுத்தப்பட்டுள்ளது. புகை, தூசி, நூலாம்படை போன்றவை இல்லாமல் சமையலறை சுகாதாரமாக இருக்க வேண்டும்.
சமையல் மற்றும் பரிமாறுவதற்குப் பயன்படுத்தப்படும் பாத்திரங்கள், ஒவ்வொரு பயன்பாட்டிற்கு முன்னும் பின்னும் நன்கு சுத்தம் செய்யப்பட வேண்டும். சமைத்த உணவை மாணவர்களுக்குப் பரிமாறுவதற்கு முன்பு, அது தரமானதாக இருப்பதை ஆசிரியர்கள் உறுதி செய்த பின்னரே வழங்க வேண்டும்.
சமைத்த உணவை மூடி வைத்துப் பாதுகாப்பாக வைத்திருக்க வேண்டும். சமையல் செய்யும்போதும், உணவைப் பரிமாறும் பாத்திரங்களில் மாற்றும்போதும், உணவுப் பொருட்கள் மூடப்பட்ட நிலையில் பாதுகாப்பாக இருப்பதை ஆசிரியர்கள் கண்காணிக்க வேண்டும்.
மாணவர்களுக்கு உணவு பரிமாறும் பணியை, பள்ளித் தலைமை ஆசிரியர்கள் மற்றும் ஆசிரியர்கள் சுழற்சி முறையில் தினமும் கண்காணித்து, தரமான உணவு கிடைப்பதை உறுதி செய்ய வேண்டும் என தொடக்கக் கல்வித்துறை உத்தரவிட்டுள்ளது.
