தமிழ்நாட்டில் உள்ள அரசு மற்றும் தனியார் மருத்துவக் கல்லூரிகளில் துணை மருத்துவப் படிப்புகளில் சேர விண்ணப்பிக்கும் கால அவகாசம் ஜூலை 7 ஆம் தேதி மாலை 5 மணி வரை நீட்டிக்கப்பட்டுள்ளது. மாணவ, மாணவியரின் கோரிக்கையை ஏற்று இந்த நீட்டிப்பு வழங்கப்பட்டுள்ளது. ஏற்கனவே ஜூலை 3 ஆம் தேதி வரை விண்ணப்பிக்க கால அவகாசம் இருந்த நிலையில், தற்போது கூடுதல் அவகாசம் அளிக்கப்பட்டுள்ளது.
பி.எஸ்சி. நர்சிங், பி.பார்ம், இளநிலை பேச்சு பயிற்சி, செயற்கை உறுப்பு சாதனங்கள் தொழில்நுட்பம், இயன்முறை மருத்துவம், தொழில்முறை சிகிச்சை, இருதய மருத்துவம் மற்றும் நுரையீரல் துறை, இருதய தொழில்நுட்பம், தீவிர சிசிச்சை தொழில்நுட்பம், நரம்பியல் மின் உடலியல், மருத்துவ கதிரியக்கவியல் மற்றும் கதிரியக்கவியல், கதிர்வீச்சு சிகிச்சை தொழில்நுட்பம், மருத்துவ ஆய்வக அறிவியல், மயக்க மருந்து மற்றும் அறுவை சிகிச்சையறை தொழில்நுட்பம், டயாலிசிஸ் சிகிச்சை தொழில்நுட்பம், மருத்துவர் உதவியாளர், அவசர மருத்துவ தொழில்நுட்பவியலாளர் பாராமெடிக்கல், சுவாச தொழில்நுட்பம், கண் பரிசோதனை மற்றும் பார்வை நுட்பம், ஊட்டச்சத்து மற்றும் உணவு முறை உள்ளிட்ட பல்வேறு பட்டப்படிப்புகளுக்கு விண்ணப்பிக்கலாம். மேலும், மருத்துவ சமூகவியல், அணு மருத்துவ தொழில்நுட்பம், சுகாதார மேலாண்மை உள்ளிட்ட பட்டப்படிப்புகளுக்கு https://tnmedicalselection.net என்ற இணையதளத்தில் விண்ணப்பிக்கலாம்.
பார்ம் டி, பார்ம், டிப்ளமோ நர்சிங், டிப்ளமோ பார்மசி ஆகிய படிப்புகளுக்கும் ஜூலை 7 ஆம் தேதி மாலை 5 மணிக்குள் விண்ணப்பிக்க வேண்டும். அலைடு ஹெல்த் சயின்ஸ் சார்ந்த பட்டயம் மற்றும் சான்றிதழ் படிப்புகளுக்கு விண்ணப்பிப்பதற்கான கால அவகாசம் ஜூலை 21 ஆம் தேதி மாலை 5 மணி வரை நீட்டிக்கப்பட்டுள்ளது. மாணவர்களுக்கான கலந்தாய்வு நடைபெறும் தேதி பின்னர் அறிவிக்கப்படும். துணை மருத்துவப் படிப்புகளில் சேர்வதற்கு 12-ஆம் வகுப்பு மதிப்பெண்கள் கணக்கில் கொள்ளப்படும் என்பது குறிப்பிடத்தக்கது.
தனியார் மருத்துவக் கல்லூரிகளில் 2026-2027, 2027-2028, 2028-2029 ஆகிய மூன்று கல்வியாண்டுகளுக்கான துணை மருத்துவப் படிப்புகளுக்கான கட்டணமும் நிர்ணயிக்கப்பட்டு அரசு அறிவித்துள்ளது. டிப்ளமோ சுகாதார ஆய்வாளர், சானிட்டரி இன்ஸ்பெக்டர் படிப்பிற்கு அரசு ஒதுக்கீட்டிற்கு ரூபாய் 35,000, நிர்வாக ஒதுக்கீட்டிற்கு ரூபாய் 70,000 கட்டணம் நிர்ணயிக்கப்பட்டுள்ளது. பிஎஸ்சி நர்சிங், போஸ்ட் பிஎஸ்சி நர்சிங் அரசு ஒதுக்கீட்டு கட்டணம் ரூபாய் 60,000, நிர்வாக ஒதுக்கீட்டு கட்டணம் ரூபாய் 1.20 லட்சம் என கட்டணம் நிர்ணயிக்கப்பட்டுள்ளது.
