பாகிஸ்தான் கிரிக்கெட் அணியில் மீண்டும் ஒரு பெரும் சர்ச்சை வெடித்துள்ளது. தொடக்க வீரர் இமாம் உல் ஹக், இங்கிலாந்துக்கு எதிரான டெஸ்ட் போட்டியில் போலியாக காயம் ஏற்பட்டதாக நாடகம் ஆடி, பேட்டிங் செய்வதைத் தவிர்த்ததாகக் குற்றச்சாட்டு எழுந்துள்ளது. இதன் காரணமாக அவருக்கு 2 ஆண்டுகள் வரை தடை விதிக்கப்பட வாய்ப்புள்ளதாகத் தகவல்கள் தெரிவிக்கின்றன.
இங்கிலாந்துக்கு எதிராக லார்ட்ஸ் மைதானத்தில் நடைபெற்ற 2-வது டெஸ்ட் போட்டியில் இமாம் உல் ஹக் விளையாடினார். ஆனால், கெண்டைக்கால் தசைப்பிடிப்பு காயம் காரணமாக அவரால் இரண்டு இன்னிங்ஸ்களிலும் பேட்டிங் செய்ய வர இயலவில்லை. இது குறித்து பாகிஸ்தான் கிரிக்கெட் வாரியம் (பிசிபி) நடத்திய முதற்கட்ட விசாரணையில், அவர் பொய்யான காயத்தைக் காட்டி ஏமாற்றியதாகச் சந்தேகம் எழுந்துள்ளது. இந்த விவகாரம் குறித்து விசாரிக்க பிசிபி ஒரு உயர்மட்டக் குழுவை அமைத்துள்ளது. இமாம் உல் ஹக் குற்றவாளி என நிரூபிக்கப்பட்டால், அவருக்கு 2 ஆண்டுகள் வரை தடை விதிக்கப்படலாம்.
முன்னதாக, கடந்த 2025 மார்ச் மாதம் நியூசிலாந்து சுற்றுப்பயணத்தின் போதும் இமாம் உல் ஹக் இதேபோன்று போலியாகக் காயமடைந்ததாகக் கூறி மருத்துவக் குழுவினரை ஏமாற்றியதாகக் குற்றச்சாட்டுகள் உள்ளன. இங்கிலாந்துக்கு எதிரான 3-வது டெஸ்ட் போட்டிக்கு முன்னதாக அணியிலிருந்து நீக்கப்பட்ட 7 வீரர்களில் இமாம் உல் ஹக்கும் ஒருவர் என்பது குறிப்பிடத்தக்கது.
இதற்கிடையே, பாகிஸ்தான் அணியிலிருந்து நீக்கப்பட்டு நாடு திரும்பிய விக்கெட் கீப்பர் முகமது ரிஸ்வான் மீதும் ஒழுங்கு நடவடிக்கை எடுக்க பாகிஸ்தான் கிரிக்கெட் வாரியம் திட்டமிட்டுள்ளது. கடந்த காலங்களில் பாகிஸ்தான் ஒருநாள் மற்றும் டி20 அணியின் கேப்டனாகச் செயல்பட்ட ரிஸ்வான், சமீபத்திய போட்டிகளில் மிக மோசமான ஷாட்களை ஆடி தனது விக்கெட்டுகளை இழந்ததால் கடும் விமர்சனங்களை எதிர்கொண்டுள்ளார்.
இதனால் அவர் இனி பாகிஸ்தான் தேசிய அணியில் தேர்வு செய்யப்பட வாய்ப்பில்லை என்று பாகிஸ்தான் கிரிக்கெட் வாரிய வட்டாரங்கள் தெரிவிக்கின்றன. இந்த அதிரடி நடவடிக்கைகள் பாகிஸ்தான் கிரிக்கெட் வட்டாரத்தில் பெரும் அதிர்ச்சியை ஏற்படுத்தியுள்ளது. இமாம் உல் ஹக்கின் இந்த செயல்பாடு, கிரிக்கெட் உலகில் பெரும் விவாதப் பொருளாக மாறியுள்ளது.
