பாகிஸ்தானின் சுழற்பந்து வீச்சாளர் நோமான் அலி, டெஸ்ட் கிரிக்கெட்டில் 100 விக்கெட்டுகளைக் கைப்பற்றி வரலாற்றுச் சாதனை நிகழ்த்தியுள்ளார். தனது 39 வயது 217 நாட்களில் இந்த மைல்கல்லை எட்டியதன் மூலம், 100 டெஸ்ட் விக்கெட்டுகளை வீழ்த்திய வயதில் மூத்த சுழற்பந்து வீச்சாளர் என்ற பெருமையை அவர் பெற்றுள்ளார்.
வங்கதேசத்திற்கு எதிரான முதல் டெஸ்ட் போட்டியின் இரண்டாவது இன்னிங்ஸில், மெஹிதி ஹசன் மிராஜின் விக்கெட்டை வீழ்த்தியபோது நோமான் அலி இந்தச் சாதனையை அடைந்தார். இங்கிலாந்து வீரர் பாபி பீல் 1896-ஆம் ஆண்டில், 39 வயது 180 நாட்களில் இதேபோன்ற சாதனையை நிகழ்த்தியிருந்தார். 130 ஆண்டுகளுக்குப் பிறகு அந்த சாதனையை நோமான் அலி தற்போது முறியடித்துள்ளார்.
ஷேர் பங்களா தேசிய ஸ்டேடியத்தில் நடந்த அந்தப் போட்டியின் இரண்டாவது இன்னிங்ஸில், மெஹிதி ஹசன் மிர்ராஸ் 24 ரன்கள் எடுத்திருந்தபோது ஆட்டமிழந்தார். நோமானின் துல்லியமான சுழற்பந்து, மிராஜின் மட்டையின் விளிம்பைத் தொட்டு, ஸ்லிப்பில் நின்ற வீரரிடம் எளிதான கேட்ச்சாக மாறியது. இது ஒரு சிறந்த சுழற்பந்து வீச்சாளரின் விக்கெட்டிற்கு உதாரணமாக அமைந்தது.
இந்த டெஸ்ட் போட்டியின் முதல் இன்னிங்ஸில், 200 பந்துகளில் 91 ரன்கள் எடுத்திருந்த மோமினுல் ஹக்கை எல்.பி.டபிள்யூ முறையில் வீழ்த்தி நோமான் அலி ஒரே ஒரு விக்கெட்டை மட்டுமே எடுத்திருந்தார். ஆனால், ஆடுகளத்தின் உதவியுடன், இரண்டாவது இன்னிங்ஸில் மூன்று விக்கெட்டுகளை வீழ்த்தி சிறப்பாகச் செயல்பட்டார்.
இரண்டாவது இன்னிங்ஸில் வங்கதேச கேப்டன் நஜ்முல் ஹொசைன் ஷாண்டோ 150 பந்துகளில் 87 ரன்கள் எடுத்திருந்தபோது எல்.பி.டபிள்யூ முறையில் ஆட்டமிழந்தார். இதேபோல் மெஹிதி ஹசன் மற்றும் தைஜுல் இஸ்லாம் ஆகியோரையும் அவர் வெளியேற்றினார். இதன்மூலம், டெஸ்ட் கிரிக்கெட் வரலாற்றில் 100 விக்கெட்டுகளை வீழ்த்திய வயதில் மூத்த பந்துவீச்சாளர்கள் பட்டியலில் நோமான் அலி முதல் இடத்தைப் பிடித்துள்ளார்.
நோமான் அலி 2021-ஆம் ஆண்டில் தனது 34-வது வயதில் டெஸ்ட் கிரிக்கெட்டில் அறிமுகமானார். பாகிஸ்தானின் முன்னணி சுழற்பந்து வீச்சாளரான யாசிர் ஷாவுக்கு ஏற்பட்ட அவசர கால மாற்று வீரராகவே அவர் அணியில் இடம்பிடித்தார். வங்கதேசத்திற்கு எதிரான இந்த டெஸ்ட் போட்டி, நோமான் அலி விளையாடிய 22-வது டெஸ்ட் ஆகும்.
டெஸ்ட் கிரிக்கெட்டில் விரைவாக 100 விக்கெட்டுகளைக் கைப்பற்றிய ஏழாவது பந்துவீச்சாளர் என்ற பெருமையையும் அவர் பெற்றுள்ளார். பாகிஸ்தான் வீரர்களில், யாசிர் ஷா (17 டெஸ்டுகள்), சயீத் அஜ்மல் (19 டெஸ்டுகள்), வக்கார் யூனிஸ் (20 டெஸ்டுகள்), முகமது ஆசிப் (20 டெஸ்டுகள்) ஆகியோருக்கு அடுத்தபடியாக, 22 டெஸ்டுகளில் இந்தச் சாதனையை எட்டி, நான்காவது இடத்தைப் பிடித்துள்ளார் நோமான் அலி.
இந்த வரலாற்றுச் சாதனையை நோமான் அலி நிகழ்த்திய போதிலும், இந்த டெஸ்ட் போட்டியில் பாகிஸ்தான் அணி இக்கட்டான சூழ்நிலையில்தான் இருந்தது. 268 ரன்கள் வெற்றி இலக்கை நோக்கிப் போராடிய பாகிஸ்தான், 154 ரன்களுக்கு 8 விக்கெட்டுகளை இழந்து தடுமாறிக் கொண்டிருந்தது. அப்போது நோமான் அலி 9 பந்துகளைச் சந்தித்து ரன் ஏதும் எடுக்காமல் களத்தில் இருந்தார்.
