சுமார் 23 லட்சம் மாணவர்களின் எதிர்காலத்தைப் புரட்டிப் போட்ட நீட் தேர்வு வினாத்தாள் கசிவு விவகாரத்தில், சி.பி.ஐ. ஒரு முக்கிய திருப்புமுனையை எட்டியுள்ளது. இந்த சதித்திட்டத்தின் பின்னணியில் இருந்த முக்கிய நபரான புனேவைச் சேர்ந்த வேதியியல் பேராசிரியர் பி.வி. குல்கர்னி, சி.பி.ஐ.யின் அதிரடி நடவடிக்கையால் கைது செய்யப்பட்டுள்ளார்.
தேசிய தேர்வு முகமையின் (NTA) சார்பாக மருத்துவ நுழைவுத் தேர்வு நடவடிக்கைகளில் ஈடுபட்டிருந்தபோது, வினாத்தாள்களை அணுகும் வாய்ப்பை குல்கர்னி பெற்றுள்ளார். இந்த வாய்ப்பை தவறாகப் பயன்படுத்தி, வினாத்தாள்களைக் கசியவிட்டதாக சி.பி.ஐ. அதிகாரிகள் தெரிவித்துள்ளனர். இந்த வழக்கில் குல்கர்னி எட்டாவது நபராகக் கைது செய்யப்பட்டுள்ளார்.
மகாராஷ்டிராவின் லாத்தூரை பூர்வீகமாகக் கொண்ட குல்கர்னி, புனேவில் 'ராஜ் கோச்சிங் கிளாசஸ்' என்ற பெயரில் தனிப்பட்ட பயிற்சி வகுப்புகளையும் நடத்தி வந்துள்ளார். நீட் தேர்வு நடைபெறுவதற்குச் சற்று முன்பு, ஏப்ரல் மாதத்தின் கடைசி வாரத்தில் நடைபெற்ற அவரது வகுப்பில், கேள்விகளையும் பதில்களையும் மாணவர்களுக்குக் கற்பித்துள்ளார். மாணவர்கள் தங்கள் குறிப்பேடுகளில் எழுதிய கேள்விகள், மே 03 அன்று நடைபெற்ற உண்மையான நீட் தேர்வு வினாத்தாளுடன் வார்த்தைக்கு வார்த்தை ஒத்துப்போனதாக அதிகாரிகள் உறுதிப்படுத்தியுள்ளனர்.
இந்த கைது நடவடிக்கை, தேர்வு செயல்முறையுடன் நேரடியாகத் தொடர்புடைய ஒருவரே வினாத்தாள் கசிவுக்குக் காரணம் என்பதை சி.பி.ஐ. உறுதிப்படுத்த உதவியுள்ளது. இது நீட் தேர்வு முறைகேடுகள் குறித்து மேலும் பல உண்மைகளை வெளிக்கொணரும் என எதிர்பார்க்கப்படுகிறது.
