நீட் தேர்வு வினாத்தாள் கசிவு விவகாரம் நாடு முழுவதும் பெரும் அதிர்ச்சியை ஏற்படுத்தியுள்ளது. இது தொடர்பாக மக்களவை எதிர்க்கட்சித் தலைவர் ராகுல் காந்தி, மத்திய அரசையும் பிரதமர் நரேந்திர மோடியையும் கடுமையாக விமர்சித்துள்ளார். இந்த விவகாரத்தில் பிரதமர் மோடி இதுவரை எந்தக் கருத்தும் தெரிவிக்காதது கண்டிக்கத்தக்கது.
தனது எக்ஸ் பக்கத்தில் வீடியோ ஒன்றை வெளியிட்ட ராகுல் காந்தி, 'நீட் தேர்வு வினாத்தாள் கசிவுக்குப் பொறுப்பேற்று மத்திய கல்வி அமைச்சர் தர்மேந்திர பிரதானை உடனடியாகப் பதவியில் இருந்து நீக்க வேண்டும். அவ்வாறு செய்யத் தவறினால், பிரதமர் மோடி தனிப்பட்ட முறையில் பொறுப்பேற்க வேண்டும்' என்று வலியுறுத்தியுள்ளார். மேலும், பாஜக – ஆர்எஸ்எஸ் கூட்டணி நாட்டின் கல்வி முறையை முற்றிலும் சீர்குலைத்துவிட்டதாக அவர் குற்றம் சாட்டினார்.
பல்கலைக்கழக துணைவேந்தர் நியமனங்களில் தகுதி மற்றும் அனுபவத்திற்குப் பதிலாக ஆர்எஸ்எஸ் கொள்கைகளைப் பின்பற்றுபவர்களே முன்னுரிமை பெறுகின்றனர். இந்தக் கல்வித்துறை வீழ்ச்சிக்கு இத்தகைய சுயநலப் போக்கே காரணம் என்றும் ராகுல் காந்தி சுட்டிக்காட்டினார். நீட் தேர்வு நடப்பதற்கு இரண்டு நாட்களுக்கு முன்பே வினாத்தாள் வாட்ஸ்அப் மூலம் கசிந்தது அனைவருக்கும் தெரியும்.
இந்த மாபெரும் முறைகேட்டால், தேர்வு எழுதிய சுமார் 22 லட்சம் மாணவர்களின் கடின உழைப்பு வீணடிக்கப்பட்டுள்ளது. மாணவர்களின் எதிர்காலத்துடன் விளையாடும் இந்தச் செயலைக் கண்டித்து, ராகுல் காந்தி பிரதமர் மோடிக்கு அழுத்தம் கொடுத்துள்ளார்.
