நாடு முழுவதும் பெரும் அதிர்வலைகளை ஏற்படுத்தியிருக்கும் நீட் தேர்வு முறைகேடு தொடர்பாக, சிபிஐ அதிகாரிகள் தீவிர விசாரணை நடத்தி வருகின்றனர். இந்த விசாரணையின் ஒரு பகுதியாக, தேர்வு வினாத்தாளைத் தயாரித்த நிபுணர் குழுவில் இடம்பெற்றிருந்த புனேவைச் சேர்ந்த தாவரவியல் விரிவுரையாளர் மனிஷா குருநாத் மந்தாரே, டெல்லியில் கைது செய்யப்பட்டார். இந்தச் சம்பவம், நீட் தேர்வு முறைகேட்டின் பின்னணியில் உள்ள பெரிய நெட்வொர்க்கை அம்பலப்படுத்தியுள்ளது.
கடந்த மே 3 ஆம் தேதி நடைபெற்ற நீட் தேர்வில் சுமார் 25 லட்சம் மாணவர்கள் பங்கேற்றனர். தேர்வு நடைபெறுவதற்கு முன்பே, அசல் கேள்விகள் அடங்கிய வினாத்தாள் கசிந்தது பெரும் பரபரப்பை ஏற்படுத்தியது. மகாராஷ்டிராவில் கசிந்த வினாத்தாள், ராஜஸ்தான் பயிற்சி மையங்களுக்கு அதிக விலைக்கு விற்கப்பட்டுள்ளது. அங்கிருந்து கேரளா உள்ளிட்ட பல்வேறு மாநிலங்களுக்கும் இந்த வினாத்தாள் லட்சக்கணக்கான ரூபாய்க்கு கைமாறியுள்ளது.
இதற்கு முன்னர், இதே வழக்கில் புனேவைச் சேர்ந்த வேதியியல் விரிவுரையாளர் பி.வி. குல்கர்னி என்பவரும் கைது செய்யப்பட்டிருந்தார். தற்போது கைது செய்யப்பட்டுள்ள மனிஷா குருநாத் மந்தாரே மற்றும் ஏற்கனவே கைது செய்யப்பட்ட பி.வி. குல்கர்னி ஆகிய இருவரும் நீட் தேர்வின் உயிரியல் மற்றும் வேதியியல் வினாத்தாளைத் தயாரிக்கும் நிபுணர் குழுவில் உறுப்பினர்களாக இருந்துள்ளனர் என்பது விசாரணையில் தெரிய வந்துள்ளது. இது, தேர்வு முறைகேட்டில் அவர்களுக்கு இருந்த நேரடித் தொடர்பை உறுதிப்படுத்துகிறது.
இந்த முறைகேடு காரணமாக, மே 3 அன்று நடைபெற்ற நீட் தேர்வை தேசிய தேர்வு முகமை (NTA) ரத்து செய்துள்ளது. வரும் ஜூன் 21 ஆம் தேதி மறுதேர்வு நடத்தப்படும் என்றும் அறிவிக்கப்பட்டுள்ளது. மறுதேர்வு எழுத மாணவர்கள் மீண்டும் பதிவு செய்யத் தேவையில்லை என்றும் தேசிய தேர்வு முகமை தெரிவித்துள்ளது. இந்த முறைகேடு, மாணவர்களின் எதிர்காலத்தோடு விளையாடியுள்ளது என்ற குற்றச்சாட்டு எழுந்துள்ளது.
