நீட் தேர்வு முறையில் அடுத்த ஆண்டு முதல் முக்கிய மாற்றங்கள் வர வாய்ப்புள்ளதாக மத்திய கல்வித்துறை அமைச்சர் தர்மேந்திர பிரதான் அறிவித்துள்ளார். இருப்பினும், இந்த மாற்றங்களுக்கு மத்திய சுகாதார அமைச்சகத்தின் ஒப்புதல் இன்னும் பெறப்படவில்லை.
நீட் தேர்வு வினாத்தாள் கசிவு சம்பவங்களைத் தொடர்ந்து, தேர்வு முறையில் சீர்திருத்தங்கள் கொண்டுவரப்படும் என எதிர்பார்க்கப்பட்டது. இதன் ஒரு பகுதியாக, அடுத்த ஆண்டு முதல் நீட் தேர்வை கணினி வாயிலாக நடத்த கல்வி அமைச்சகம் திட்டமிட்டுள்ளது. மேலும், தேர்வை பல அமர்வுகளாக நடத்துவது, முயற்சி எண்ணிக்கை மற்றும் வயது வரம்புக்கு உச்ச வரம்பு நிர்ணயிப்பது போன்ற பிற பரிந்துரைகளும் பரிசீலனையில் உள்ளன.
டாக்டர் ராதாகிருஷ்ணன் தலைமையில் அமைக்கப்பட்ட உயர்நிலைக் குழு, தேர்வை மேம்படுத்துவதற்காக மூன்று முக்கியப் பரிந்துரைகளை சுகாதார அமைச்சகத்திடம் சமர்ப்பித்திருந்தது. இதில், பேனா மற்றும் காகித முறையை மாற்றி கணினி வாயிலாகத் தேர்வை நடத்துதல், பல அமர்வுகளாக நடத்துதல், முயற்சி எண்ணிக்கை மற்றும் வயது வரம்புக்கு உச்ச வரம்பு நிர்ணயித்தல் ஆகியவை அடங்கும். இதில், வயது மற்றும் முயற்சி வரம்பு குறித்த பரிந்துரை மட்டும் தற்போது சுகாதார அமைச்சகத்தின் பரிசீலனையில் உள்ளது.
தற்போது, நீட் தேர்வுக்கு குறிப்பிட்ட முயற்சி எண்ணிக்கை அல்லது வயது வரம்பு இல்லை. இதனால், 50-60 வயதுடையவர்கள் கூட விண்ணப்பித்து வருகின்றனர். ஒவ்வொரு ஆண்டும் சுமார் 22 முதல் 23 லட்சம் மாணவர்கள் இத்தேர்வை எழுதுகின்றனர். இந்த மாற்றங்கள் நடைமுறைக்கு வந்தால், விண்ணப்பிக்கும் மாணவர்களின் எண்ணிக்கை குறையக்கூடும் என எதிர்பார்க்கப்படுகிறது. மேலும், நீட் தேர்வுடன் ஜேஇஇ மெயின்ஸ் தேர்வை இணைப்பது குறித்தும் நீண்டகாலப் பரிந்துரை அளிக்கப்பட்டுள்ளது, இது குறித்தும் ஆலோசிக்கப்பட்டு வருகிறது.
