தமிழக அரசின் 100 நாள் ஆட்சிக்கு மைனஸ் 80 மதிப்பெண்கள் வழங்கப்படுவதாக பாஜக மாநில தலைவர் நயினார் நாகேந்திரன் நெல்லையில் தெரிவித்துள்ளார்.
திருநெல்வேலியில் செய்தியாளர்களைச் சந்தித்த அவர், கடந்த காலங்களில் சட்டமன்றத்தில் ஆக்கப்பூர்வமான விவாதங்கள் நடைபெற்றதாகக் குறிப்பிட்டார். தான் சட்டமன்ற உறுப்பினராக இருந்தபோது, நெடுஞ்சாலைத்துறை அமைச்சர் எ.வ.வேலுவிடம் கோரிக்கை வைத்ததன் பேரில் நெல்லைக்கு ரூ. 350 கோடியில் புறவழிச்சாலை திட்டம் கொண்டுவரப்பட்டதாக அவர் நினைவு கூர்ந்தார்.
மேலும், மிகவும் பின்தங்கிய மற்றும் ஒடுக்கப்பட்ட மக்கள் வாழும் மானூர் பகுதிக்கு அரசு கலைக் கல்லூரி ஒன்றை அப்போதைய முதலமைச்சர் மு.க.ஸ்டாலின் வழங்கியதையும், கட்சிப் பாகுபாடின்றி அனைத்து தொகுதிகளுக்கும் திட்டங்கள் செய்யப்பட வேண்டும் என மு.க.ஸ்டாலின் உத்தரவிட்டதையும் நயினார் நாகேந்திரன் சுட்டிக்காட்டினார்.
ஆனால், இன்றைய சட்டமன்றத்தில் அமைச்சர்கள் உறுப்பினர்களைப் பார்த்து 'உன் மாமாவிடம் கேள், உன் அப்பாவிடம் சொல்' என்று தரம் தாழ்ந்து பேசுவது வருத்தமளிப்பதாக அவர் வேதனை தெரிவித்தார். காங்கிரஸ் கட்சியினர் யாரிடமும் நம்பிக்கையாக இருக்க மாட்டார்கள் என்றும், திமுகவுடன் 15 வருடங்கள் நம்பிக்கையாக இருந்துவிட்டு, ஒரே நிமிடத்தில் ஓடிவிட்டதாகவும் அவர் விமர்சித்தார்.
தலைமைச் செயலகத்தில் முதலமைச்சர் அறையை மாற்றி அமைக்கும் பணிக்காக ரூ. 5.40 கோடி செலவிடப்பட்டுள்ளது. இதற்கான டெண்டர் எதுவும் கோரப்படவில்லை என்பதை அமைச்சரே ஒப்புக்கொண்டுள்ளார். டெண்டர் இன்றி இவ்வளவு பெரிய தொகையை நேரடியாகப் பணிகளுக்கு ஒதுக்கீடு செய்வது கூட்டு ஊழல் என நயினார் நாகேந்திரன் குற்றம் சாட்டினார். இதன் காரணமாக, இந்த தவெக அரசின் 100 நாள் ஆட்சிக்கு மைனஸ் 80 மதிப்பெண்கள் வழங்குவதாகவும் அவர் கூறினார்.
ஆளும் அரசு பொய்யான ரீல்ஸ்களை பரப்பி வருவதாகவும், தேவையில்லாத பொய் செய்திகள் இளம் தலைமுறையின் எதிர்காலத்தை பாதிக்கும் என்றும் அவர் எச்சரித்தார். தனித் தொகுதி என்ற பெயர் யாருடைய மனதையாவது புண்படுத்தும் வகையில் இருந்தால், அதனை மாற்றுவது நல்லது என்றும் அவர் கருத்து தெரிவித்தார்.
நெல்லை மட்டுமல்லாமல் நாகர்கோவில், கோவில்பட்டி என தினந்தோறும் தமிழ்நாடு முழுவதும் கொலைகள் நடந்து வருவதாகவும், எனவே மாநிலம் முழுவதும் சட்டம் ஒழுங்கு சீர்கெட்டுள்ளது என்றும் நயினார் நாகேந்திரன் கூறினார்.
