சென்னை அண்ணா அறிவாலயத்தில் நடைபெற்ற தி.மு.க. மகளிர் அணியின் ஆலோசனைக் கூட்டத்தில் தி.மு.க. தலைவர் மு.க.ஸ்டாலின் உரையாற்றினார். அப்போது அவர், 'அடுத்து வரும் தேர்தல்களில் மக்களே இந்த தவெக ஆட்சியை அகற்றுவார்கள். தவெக ஆட்சியில் குற்றச்சம்பவங்கள் பெருகிவிட்டன. தவெகவுக்கு ஏன் வாக்களித்தோம் என்று மக்கள் தற்போது வருந்துகின்றனர்' என்று கூறினார்.
மேலும் பேசிய அவர், 'திமுக பெற்ற வாக்குகளுக்கு மகளிர் அணியும் முக்கிய காரணம். திமுக ஆளுங்கட்சியாக மாற இன்னும் சுறுசுறுப்பாக செயல்பட வேண்டும். ஆளுங்கட்சியைச் சேர்ந்த பெண்ணுக்கே பாலியல் கொடுமை நடந்துள்ளது. முதலமைச்சர் விஜய்க்கே தன் ஆட்சி மீது நம்பிக்கை இல்லையா? அதிமுக எம்எல்ஏக்களை முதலமைச்சர் விஜய் ஷாப்பிங் செய்கிறார். தவெகவினரிடம் இருந்து பாதுகாப்பு வேண்டும் என்று மக்கள் கேட்கும் நிலை வந்துவிட்டது. பெண்களுக்கு எதிரான பெரும்பாலான குற்றங்களில் தவெகவினரே ஈடுபடுவதாக செய்திகள் வருகின்றன' என குற்றம் சாட்டினார்.
'பாஜக மற்ற மாநிலங்களில் செய்வதை இங்கு விஜய் செய்கிறார். ஒரே மாதத்தில் கேலிக்கூத்தான, அசிங்கமான ஆட்சியாக தவெக ஆட்சி மாறியுள்ளது. கான்பிடன்டாக இருங்கள் என்ற விஜயே நம்பிக்கையுடன் இல்லை. தீர்ந்துபோன சக்தி என்று சொன்ன கட்சிகளின் எம்.எல்.ஏ.க்களையே திருடுகிறார் விஜய்' என்றும் ஸ்டாலின் விமர்சித்தார்.
'திமுக ஆட்சியில் மக்களுக்கு பார்த்து பார்த்து திட்டங்களை செய்துக் கொடுத்தோம். தவெக ஆட்சியில் நாள்தோறும் குற்றச்சம்பவங்கள் நடக்கின்றன. பாலியல் வன்முறை, அரிவாள் வெட்டு, பெட்ரோல் குண்டு வீச்சு நடக்கும்போது விமர்சிக்காமல் இருக்க முடியுமா? நான் நிதி ஆயோக் கூட்டத்துக்கு சென்றபோது ED வழக்கில் தப்பிக்க சென்றேன் என்றார் விஜய். பாஜகவை உறுதியாக விமர்சித்தால் ஆட்சிக்கு ஆபத்து வரும் என அமைதியாக இருக்கிறீர்களா? நிதி ஆயோக் கூட்டத்தில் திமுகவின் சாதனைகள், திமுக முன்வைத்த கோரிக்கைகளை பேசியுள்ளார் விஜய்' என ஸ்டாலின் கடுமையாக சாடினார்.
