தூத்துக்குடி மாவட்டம் ஸ்ரீவைகுண்டம் அருகே உள்ள பனைவிளை கிராமத்தில், 60 ஆண்டுகளுக்கும் மேலாக பழமையான பொதுக் கிணற்றை ஆக்கிரமிப்பு செய்ததாக அமைச்சர் ஜெகதீஸ்வரி மீது கிராம மக்கள் குற்றம்சாட்டியுள்ளனர். இந்த கிணறு அப்பகுதி மக்களின் குடிநீர் ஆதாரமாக இருந்து வந்துள்ளது.
தற்போது, அமைச்சர் பதவியில் இருக்கும் ஜெகதீஸ்வரியின் தந்தை, அந்த இடத்தை தனது சொந்த இடம் என்று கூறி வேலி அமைத்து ஆக்கிரமிப்பு செய்துள்ளதாக கிராம மக்கள் புகார் தெரிவித்துள்ளனர். இதனால், பொதுமக்கள் அந்த பொதுக் கிணற்றை பயன்படுத்த முடியாமல் மிகுந்த சிரமத்திற்கு ஆளாகியுள்ளனர்.
இதுகுறித்து அமைச்சர் ஜெகதீஸ்வரியிடம் மனு அளித்தும் எந்த நடவடிக்கையும் எடுக்கப்படவில்லை என்றும், 'அது எங்களுடைய இடம், எங்கள் தாத்தா எங்களுக்கு எழுதி கொடுத்துவிட்டார், நாங்கள் அதை கொடுக்க மாட்டோம்' என்று அமைச்சர் தரப்பில் கூறப்பட்டதாகவும் கிராம மக்கள் வேதனையுடன் தெரிவித்தனர்.
மேலும், காவல்துறையினரை கொண்டு தங்களை மிரட்டுவதாகவும் அப்பகுதி மக்கள் குற்றஞ்சாட்டியுள்ளனர். இந்த விவகாரம் குறித்து உரிய விசாரணை நடத்தி, பொதுமக்களின் பயன்பாட்டிற்கு அந்த கிணற்றை மீட்டுத் தர வேண்டும் என கோரிக்கை விடுத்துள்ளனர்.
பனைவிளை கிராம மக்களின் இந்த புகார், அப்பகுதியில் பெரும் பரபரப்பை ஏற்படுத்தியுள்ளது. பல ஆண்டுகளாக பயன்பாட்டில் இருந்த ஒரு பொதுக் கிணறு, தனிநபர் ஆக்கிரமிப்பால் பாதிக்கப்பட்டுள்ளது பொதுமக்களிடையே அதிர்ச்சியை ஏற்படுத்தியுள்ளது.
அமைச்சர் குடும்பத்தினர் மீது சுமத்தப்பட்டுள்ள இந்த குற்றச்சாட்டுக்கள் குறித்து உரிய விசாரணை நடத்தப்பட வேண்டும் என்றும், மக்களின் அடிப்படைத் தேவைகள் பாதிக்கப்படாமல் இருப்பதை உறுதி செய்ய வேண்டும் என்றும் சமூக ஆர்வலர்கள் வலியுறுத்தியுள்ளனர்.
இந்த பிரச்சனைக்கு விரைவில் தீர்வு காணப்படாவிட்டால், கிராம மக்கள் சார்பில் அடுத்தகட்ட போராட்டங்கள் நடத்தப்படும் என்றும் எச்சரிக்கை விடுக்கப்பட்டுள்ளது. இதுகுறித்து மாவட்ட நிர்வாகம் உடனடியாக தலையிட்டு நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.
