இஸ்லாமியர்களின் புனிதமான பண்டிகைகளில் ஒன்றான மிலாடி நபி, மிலாத் உன் நபி என்றும் அழைக்கப்படுகிறது. இது இறைத்தூதர் முகம்மது நபிகளின் பிறந்த தினத்தைக் கொண்டாடும் ஒரு சிறப்புமிக்க நாள் ஆகும். ஒவ்வொரு ஆண்டும், புனித மாதமான ரபி உல் அவ்வல் மாதத்தில், இஸ்லாமியர்களால் இந்த திருநாள் வெகு விமரிசையாகக் கொண்டாடப்படுகிறது. உலகம் முழுவதும் உள்ள இஸ்லாமியர்கள் இந்த நாளை மிகுந்த உற்சாகத்துடன் கொண்டாடுகின்றனர்.
முகம்மது நபிகள் மனித குலத்திற்கு வழங்கிய போதனைகளை நினைவு கூர்வதற்கும், இஸ்லாமிய மக்களை ஒன்றிணைக்கும் ஒரு வலிமையான நாளாகவும் மிலாடி நபி திகழ்கிறது. இந்த நன்னாளில், இஸ்லாமியர்கள் ஒன்று கூடி பேரணியாகச் சென்று தங்களின் ஒற்றுமையை வெளிப்படுத்துவது வழக்கம். முகம்மது நபிகளின் வாழ்க்கை வரலாற்றை எடுத்துரைத்து, சிறப்புத் தொழுகைகள் நடத்தி, இனிப்புகளைப் பரிமாறிக் கொள்வது ஒரு முக்கிய நிகழ்வாகும்.
நபிகள் நாயகம் இஸ்லாமிய சமூகத்தில் ஏற்படுத்திய தாக்கத்தையும், அவரது போதனைகளையும் நினைவுகூர்ந்து, தங்களின் ஒற்றுமையை புதுப்பித்துக் கொள்ளும் ஒரு உன்னத வாய்ப்பை இந்த மிலாடி நபி திருநாள் வழங்குகிறது. சிலர், முகம்மது நபிகள் கிமு 570 ஆம் ஆண்டு, சந்திரனை அடிப்படையாகக் கொண்ட இஸ்லாமிய நாட்காட்டியின் 12வது மாதமான ரபி அல் அவ்வல் மாதத்தில் மெக்காவில் பிறந்ததாகக் கூறுகின்றனர். இஸ்லாம் தோன்றிய காலம் முதலே மிலாடி நபி கொண்டாடப்பட்டு வருவதாகவும் சில கருத்துக்கள் உள்ளன.
ஃபாத்திமிட்கள் தான் முதலில் இந்த பண்டிகையைக் கொண்டாடத் துவங்கியதாகவும் கூறப்படுகிறது. நபிகள் நாயகத்தின் வாழ்க்கை, அவரது நேர்மை, பணிவு, தாராள மனப்பான்மை, மற்றும் நீதி ஆகியவற்றின் மாண்புகளை நினைவுகூர்ந்து, அவற்றை போற்றும் தினமாக மிலாடி நபி விளங்குகிறது. இந்த கொண்டாட்டம் முதன்முதலில் எகிப்தில் நடைபெற்றதாகவும், பின்னர் 11 ஆம் நூற்றாண்டு வாக்கில் உலகம் முழுவதும் பரவியதாகவும் சொல்லப்படுகிறது.
மிலாடி நபி திருநாளின் போது, இஸ்லாமியர்கள் தெருக்களையும், மசூதிகளையும் வண்ண விளக்குகள் மற்றும் பச்சை நிற கொடிகளால் அலங்கரிப்பார்கள். பெண்கள் பல்வேறு வகையான உணவு வகைகளைச் சமைத்து மகிழ்வார்கள். இந்த நாளில், அல்லாஹ்வை தொழுது அவரது ஆசிகளைப் பெறுவது வழக்கம். சிலர், ஹஜ் அல் தர்ஹா, ஜம்மா மசூதி போன்ற பிரபலமான இடங்களுக்குச் சென்று சிறப்புத் தொழுகைகள் நடத்துகின்றனர்.
இந்த நாளில் ஏழைகளுக்கு தானம் வழங்குவது இஸ்லாத்தில் மிக முக்கியமானதாகக் கருதப்படுகிறது. அல்லாஹ்வின் மீது உண்மையான பற்று கொண்டவர்கள், ஏழைகளுக்கும் சிறுவர்களுக்கும் தானங்கள் வழங்குவதன் மூலம் இறை அருளைப் பெற முடியும் என்று நம்புகிறார்கள். குடும்ப உறுப்பினர்கள் ஒன்று கூடி, குழந்தைகளுக்கு முகம்மது நபிகளின் கதைகளையும், அவரது போதனைகளையும், கருணை மற்றும் இரக்க குணங்களையும் எடுத்துரைக்கின்றனர். இது அவர்களின் ஒற்றுமையையும், இறை நம்பிக்கையையும் வலுப்படுத்தும் ஒரு புனிதமான நாளாகும்.
